Станіслаў Шушкевіч: Маю права сказаць ад імя Беларусі Ельцыну дзякуй

Барыс Ельцын быў першым кіраўніком расейскай дзяржавы, які прызнаў незалежнасць нашай краіны, падпісаўшы Белавежскія пагадненні.

Станіслаў Шушкевіч, які прадстаўляў Беларусь на адкрыцці «Ельцын-цэнтра», распавёў «Салiдарнасцi» пра сустрэчу ў Екацярынбургу.

- На адкрыцці цэнтра я быў па запрашэнні Наіны Іосіфаўны Ельцынай, - сказаў ён. - З вялікай радасцю з ёй сустрэўся, вельмі рады, што яна ў добрай форме. Бачыўся таксама з былымі міністрамі, памочнікамі Ельцына, даўнімі маімі знаёмымі. Арганізавана ўсё было выдатна, з Масквы было два поўных чартэры. На цырымоніі прысутнічала добрая цёплая абстаноўка, з вялікім задавальненнем бываю ў Екацярынбургу.

Цэнтр адкрылі выдатны, я раптам убачыў сябе ў 3D выкананні і на фотаздымках - многія ў мяне ёсць, многіх у мяне няма. І самае галоўнае, што была вельмі добрая размова. Успаміналі аб тым, хто такі Ельцын і што ён зрабіў. Заявіў журналістам: я маю права сказаць ад імя Беларусі Ельцыну дзякуй, бо гэта першы кіраўнік расейскай дзяржавы, які прызнаў незалежнасць нашай краіны, падпісаўшы Белавежскія пагадненні.

Ну а потым, як гэта цяпер прынята ў Расеі, са спазненнем на паўтары гадзіны прыехаў Пуцін. Ён жа не любіць прыбываць своечасова. Пуцін прамовіў правільныя словы, на якія пярэчанняў быць не можа.

- СМІ паведамлялі, што Аляксандра Лукашэнку таксама запрашалі на адкрыццё «Ельцын-цэнтра». Але яго чамусьці не было.

- У мяне няма інфармацыі, што яго запрашалі. І наогул я здзівіўся... Лукашэнка ж шмат кантактаваў з Ельцыным, але потым дрэнна пра яго выказваўся, можа, гэта адбілася - у цэнтры я не бачыў ніводнай ягонай фатаграфіі з Ельцыным, ніводнага ягонага выказвання пра Ельцына.