Дзмітрый Тымчук: Знішчэнне Турцыяй Су-24 не спыніць Пуціна
3- 27.11.2015, 15:58
- 21,489
Уладзімір Пуцін па-ранейшаму ўпэўнены, што можа запалохаць Захад сваёй зброяй.
Перакідка расейскіх ракетных комплексаў С-400 у Сірыю сведчыць пра гатоўнасць Крамля да далейшай эскалацыі ў рэгіёне. А сам прэзідэнт краіны-агрэсара Уладзімір Пуцін па-ранейшаму ўпэўнены, што можа запалохаць Захад сваёй зброяй. Такое меркаванне карэспандэнту «Лiга.net» у кулуарах парламента агучыў дэпутат фракцыі «Народны Фронт» Дзмітрый Тымчук.
«Рыторыка і логіка Пуціна не мяняюцца - ён мяркуе, што можа запалохаць Захад з ваенных пазіцый, і, на жаль, ягоныя разлікі ў значнай ступені апраўдваюцца. Захад па-ранейшаму не разумее, да якой рысы гатовы пайсці Пуцін. Яны ведаюць, што Расея - краіна, якая валодае сур'ёзным вайсковым патэнцыялам, самае галоўнае - ядзернымі ўзбраеннямі. Пасля падзей у Турцыі мы адразу бачым перакідку комплексаў С-400, і гэта само па сабе зразумелы ваенна-палітычны адказ на гэтыя падзеі, які кажа, што Расея гатовая пайсці далей», - сказаў ён.
Са словаў Тымчука, пасля заканчэння «халоднай вайны» і да пачатку 2010 гадоў Захад зусім не ўспрымаў Пуціна як патэнцыйнага ворага, здольнага пачаць ваенныя дзеянні ў Еўропе або іншай частцы свету.
«Кожнага экспэрта, які ў тыя гады пачаў бы такі пункт гледжання прасоўваць, уважалі б за інтэлектуальна недаразвітага. Менавіта такую рэакцыю мы назіралі ў момант пачатку агрэсіі супраць Украіны. Захад без цяжкасцяў «з'еў» напад на Грузію, па Прыднястроўі ў яго таксама пытанняў не было, і пасля пачатку падзей у Крыме было тое ж самае. Еўропа занадта доўга не магла паверыць, што Расея здольная на такія крокі. І перыяд гэтага «разварушвання» не скончыўся дагэтуль», - мяркуе дэпутат.
На ягоную думку, у еўрапейцаў па-ранейшаму мала выразнай інфармацыі аб тым, што сапраўды адбываецца ва Украіне, і яны ўсё адно не ўспрымаюць Пуціна як ворага.
«Калі чытаць украінскія СМІ, можа стварыцца ўражанне, што на Захадзе ўсе ненавідзяць Пуціна. Але досыць пагутарыць з еўрапейцамі, каб зразумець, што гэта зусім не так. Ёсць краіны, якія звязваюць шмат надзей менавіта з Расеяй, шмат у чым у галіне эканамічнага супрацоўніцтва. Фактычна Захад пакуль не гатовы нават да «халоднай вайны» ўзору 1980-х, і Пуцін гэта выдатна разумее», - адзначыў Тымчук.
Расея ўзмоцнена піярыць сваё ўзбраенне і войска, каб на Захадзе заставаўся страх вайсковага супрацьстаяння, і гэта спрацоўвае, канстатуе парламентарый.
«Заходні абывацель катэгарычна супраць усякіх умяшанняў сваіх краін ва ўсякія ваенныя дзеянні. Агулам жа Расея робіць усё, каб Захад не разглядаў варыянты вайсковых адказаў, і пакуль ёй гэта ўдаецца», - дадаў дэпутат.
Раней прэзідэнт Турцыі Раджэп Таіп Эрдаган заявіў, што ўжыванне расейцамі разгорнутых на расейскай авіябазе Хмеймім зенітна-ракетных комплексаў С-400 Трыумф супраць турэцкіх баявых самалётаў у небе Сірыі Анкара расцэніць як акт ваеннай агрэсіі.
Нагадаем, 24 лістапада турэцкія знішчальнікі F-16 пасля 10 папярэджанняў знішчылі расейскі бамбавік Су-24, які ўварваўся ў паветраную прастору краіны. Пілоты катапультаваліся, адзін з іх загінуў.