Імпарт піва ў Беларусь знізіўся на 20%
6- 30.11.2015, 15:52
- 16,904
Імпарт піва ў Беларусь у студзені-верасні скараціўся ў фізічным выражэнні на 20,4% у параўнанні з аналагічным перыядам мінулага года.
Пра гэта сведчаць звесткі афіцыйнай статыстыкі, паведамляе БелаПАН.
За студзень-верасень у краіну было ўвезена 7,9 млн дал піва супраць 9,9 млн дал за аналагічны перыяд мінулага года.
У вартасным выразе скарачэнне імпарту яшчэ больш значнае. У студзені-верасні аб'ём піўнога імпарту склаў 30,2 млн даляраў і скараціўся на 44,2% у параўнанні з дзевяццю месяцамі мінулага года.
У гэтым годзе назіраецца скарачэнне піўнога імпарту як з Расеі, так і з Украіны, якія з'яўляюцца асноўнымі пастаўшчыкамі ячменнага напою ў Беларусь.
Так, аб'ём імпарту піва з Расеі скараціўся ў студзені-верасні на 23,4% у фізічным выражэнні і на 48,1% у вартасным. З Украіны імпарт піва ў фізічным выражэнні знізіўся на 6,8% і на 29,4% у вартасным.
Удзельнікі беларускага рынку тлумачаць скарачэнне ўвозу імпартнага піва ў краіну зніжэннем пакупніцкай здольнасці насельніцтва.
«У гэтым годзе падалі на беларускім рынку самыя дарагія імпартныя брэнды. Да гэтага прывяло зніжэнне пакупніцкай здольнасці насельніцтва», - адзначыў у размове на мінулым тыдні генеральны дырэктар ААТ «Лідскае піва» Аўдрыус Мікшыс.
У будучым годзе, паводле ацэнак півавараў, рынак піва ў Беларусі расці не будзе. Чакаецца, што спажыванне ячменнага напою ў краіне захаваецца на ўзроўні 2015 года.
У студзені-верасні гэтага года беларускія кампаніі рэалізавалі на ўнутраным рынку 26,65 млн дал піва. У параўнанні з аналагічным перыядам мінулага года аб'ём продажаў піва на ўнутраным рынку знізіўся на 3,9%. Павялічыць рэалізацыю піва ў названы перыяд змаглі толькі дзве айчынныя кампаніі - «Крыніца» і «Лідскае піва» на 3,6% і 6,9% адпаведна.