«А што ў іх будзе беларускага, акрамя паветра ў колах?»

Лукашэнка і падначаленыя мараць аб масавай зборцы беларускіх легкавых аўтамабіляў.

«Салiдарнасць» узгадвае некалькі супярэчлівых падзей, якія разгортваліся вакол вырабленых у Беларусі кітайскіх аўтамабіляў.

Як кітайцы беларускімі землямі завалодалі

У 2014 годзе беларусы дзівіліся беспрэцэдэнтным ільготам, якія беларускія ўлады далі кітайцам для арганізацыі вытворчасці легкавікоў. Напрыклад, праект дзяржаўнай інвестыцыйнай праграмы прадугледжваў перадачу кітайскім бізнэсоўцам 120 гектараў зямлі ў Барысаўскім раёне ў арэнду амаль на 100 гадоў!

Зрэшты, вельмі хутка стала зразумелая прычына такой нябачанай шчодрасці - агульная сума ўкладанняў у будаўніцтва новага завода была ацэненая на 650 мільёнаў даляраў. Натуральна, за кітайскі кошт.

Аўтамабіль, што ржавее проста ў краме

Пасля пачатку зборкі выставачны асобнік аўтамабіля Geely быў заўважаны адным з блогераў у менскім гандлёвым цэнтры. Праўда, таварны выгляд аўтамабіля быў трохі прыпсаваны, што прымусіла беларусаў задумацца пра якасць зборачных работ на прадпрыемстве.

Тады журналісты выказалі здагадку, што такую «хуткую карозію» кодабнага элемента самахода, якая выраблены максімум паўгода таму і ў рэальных дарожных варунках не эксплуатаваўся, маглі выклікаць парушэнні тэхналогіі афарбоўкі.

Народ прапанаваў перасадзіць чыноўнікаў на Geely

Ужо ў 2015 годзе ініцыятыўныя беларусы, у сувязі з «цяжкай сітуацыяй, якая склалася на валютным рынку і ў эканоміцы нашай краіны, а таксама адсутнасцю належнай увагі і рэакцыі з боку ўлад на афіцыйныя звароты» пачалі збор подпісаў.

Людзі запатрабавалі прыняць закон, які абавязвае чыноўнікаў набываць у якасці службовых транспартных сродкаў аўтамабілі выключна айчыннай вытворчасці.

Тады пад дакументам падпісаліся больш за 11 тысяч чалавек, аднак самі чыноўнікі прапановай не надта натхніліся.

Крэдыты - за кошт бюджэту

У ліпені стала вядома, што ўрад Беларусі ўклаў пагадненне з Экспартна-імпартным банкам Кітая аб атрыманні льготнага пакупніцкага крэдыту на суму 158,7 млн даляраў.

У адпаведнасці з крэдытным пагадненнем атрымальнікам сродкаў з'яўляўся СЗАТ «БелДжы». Пры гэтым, згодна з пастановай урада, абавязанне сплачваць крэдыт было ўскладзенае на Міністэрства фінансаў за кошт сродкаў, прадугледжаных у нацыянальным бюджэце на 2015 і наступныя фінансавыя гады на абслугоўванне і аплату замежнай дзяржаўнай пазыкі.

Са слоў экспэртаў, «у выпадку краху з Geely за крэдыт можа заплаціць кожны беларус».

***

Цікава, што першыя асобы краіны беларуска-кітайскія аўтамабілі хоць і выпрабавалі, але па-ранейшаму ўважаюць за лепшае карыстацца звыклымі замежнымі маркамі.

Народ таксама да беларуска-кітайскіх аўтамабіляў усё яшчэ прыглядаецца і нярэдка адпускае з'едлівыя жарты:

«Пад чулым і мудрым кіраўніцтвам і наглядам Кітая яшчэ якія будуць аўто! Нават і не сумнявайцеся!»

«Словазлучэнне «якаснае» і «беларуска-кітайскае» ну ніяк нельга спалучыць...»

«А што ў іх будзе беларускага, акрамя паветра ў колах?»

«Няхай Лукашэнка пакажа сам народу прыклад і перасядзе з «Майбаха» на кітайскую прадстаўнічую балею. Глядзіш, люд і прысунецца...» - пішуць карыстальнікі дыскусійнай пляцоўкі Talks.by.