Украінская паліцыя кажа «Бывай» расейскім сацыяльным сеткам

Новая паліцыя Украіны, чыё з'яўленне летам гэтага года выклікала небывалы ажыятаж у сацыяльных сетках краіны, запусціла флэшмоб: «ВК» і «Аднакласнікі», даруйце».

Такім чынам прайшоўшыя атэстацыю вартавыя парадку падтрымалі ініцыятыву МУС Украіны, якая рэкамендавала ўстрымацца ад усякага выкарыстання расейскіх сацыяльных сетак, паведамляе расейская служба BBC.

Прадпісанні міністэрства не распаўсюджваюцца на іншыя сацыяльныя сеткі, такія, як «Твітэр» і «Фэйсбук».

Многія паліцыянты выклалі на сваіх старонках банэр невядомага аўтарства, дзе пад лагатыпамі «Вконтакте» і «Аднакласнікаў» стаіць надпіс «Бувайте» («Бывайце»).

Як сказаў прэс-сакратар МУС Украіны Арцём Шаўчэнка, паліцыянтам настойліва рэкамендуюць не карыстацца сацыяльнымі сеткамі, якія «мадэруюцца з тэрыторыі краіны-агрэсара». «Гэтыя сацыяльныя сеткі могуць выкарыстоўвацца расейскай выведкай у мэтах інфармацыйнай вайны і ўжывання псіхалагічнага ціску», - адзначыў Шаўчэнка.

«Не рыхтаваць глебу для інфармацыйнай вайны»

Акрамя таго, на мінулым тыдні Нацыянальная паліцыя правяла ў сваіх шэрагах праверку і высветліла, што некаторыя супрацоўнікі ўхвалялі дзеянні ўзброеных прыхільнікаў так званых «рэспублік» на ўсходзе краіны.

«За антыдзяржаўныя публікацыі ў сацыяльных сетках звольненыя чацвёра патрульных з Адэсы. Паводле вынікаў праверкі, праведзенай Дэпартаментам процідзеяння кіберзлачыннасці Нацпаліцыі, высветлена, што чацвёра супрацоўнікаў паліцыі ў сваіх уліковых запісах ў сацыяльных сетках свядома размяшчалі інфармацыю антыўкраінскага зместу. Работнікі патрульнай паліцыі Адэсы патлумачылі, што інфармацыю яны атрымлівалі з крыніц сепаратысцкага толку. Пры гэтым матывы, паводле якіх работнікі паліцыі вялі распаўсюджванне антыдзяржаўных публікацый, не былі прызнаныя досыць аргументаванымі», - сказана на сайце МУС Украіны.

У гэты момант міністэрства правярае ўжо іншых паліцыянтаў.

Дарадца кіраўніка ўкраінскага МУС Антон Герашчанка паведаміў аб звальненні яшчэ аднаго супрацоўніка за тое, што той размясціў у лютым мінулага года паведамленне з падтрымкай падаўлення пратэстаў кіеўскага «Еўрамайдану», якія скончыліся зменай улады ў краіне.

«Інфармацыі аб тым, што ў перыяд Майдана супрацоўнік Кіеўскай патрульнай паліцыі Аляксей Саўкін захапляўся зверствамі «Беркута» і іншымі дзеяннямі супраць Рэвалюцыі годнасці, была правераная і знайшла сваё пацверджанне [...] Падчас правядзення гутаркі Саўкін растлумачыў, што ён у той час жыў у Данецку, адкуль яму давялося з'ехаць як уцекачу, там ён зазнаў антыўкраінскую інфармацыйную прапаганду і просіць гэта ўлічыць пры прыняцці пастановы аб ягонай далейшай працы ў патрульнай службе. [...] Я перакананы, што на дзяржаўнай службе Аляксею Саўкіну і тым, хто падзяляў ягоныя перакананні, рабіць няма чаго!» - Піша дарадца кіраўніка ўкраінскага МУС Антон Герашчанка.