Камароўскі: Нельга выключаць продажу ўзбраенняў Украіне

Прэзідэнт Польшчы заявіў, што ягоная краіна не пастаўляе зброю войску Украіны таму, што Кіеву «асабліва і няма чым плаціць».

Пра гэта заявіў Браніслаў Камароўскі ў інтэрв'ю тэлеканалу TVN24. З ягоных слоў, нельга выключаць продажу ўзбраенняў Украіне Польшчай, паколькі гэта азначала б добраахвотную адмову ад сродкаў уздзеяння на сітуацыю, якая склалася ў Данбасе, паведамляе «Еўрапейская праўда».

«Цяпер мы не прадаём зброю Украіне, бо ёй асабліва няма за што яе купляць. Аднак выключаць такія абставіны было б памылкай, паколькі гэта азначала б страту рычагоў уплыву на сітуацыю», - сказаў ён.

Разам з тым, з ягоных слоў, ЗША і іншыя краіны пакуль толькі заяўляюць аб магчымых пастаўках зброі, але нічога не робяць на практыцы. «Таму што цяжка сабе ўявіць ваеннае ўрэгуляванне гэтага канфлікту. У ваенных дзеяннях ва Украіны невялікія шанцы, але яна мае права сябе абараняць», - падкрэсліў прэзідэнт.

У дачыненні да няўдзелу Польшчы ва ўрэгуляванні крызісу ва Украіне Камароўскі заявіў, што не хоча вінаваціць свайго ўкраінскага калегу, які выбраў ФРГ і Францыю, паколькі гэта «вызначальныя для палітыкі ЕЗ» краіны. З ягоных слоў, Польшча ўжо адыграла сваю «вызначальную ролю», калі была адзіным адвакатам еўрапейскага шляху Украіны ў Еўропе. «Сёння мы павінны ганарыцца тым, што нам удалося пераканаць іншыя еўрапейскія краіны накіраваць місію ва Украіну» , - адзначыў ён.

Фота: prezydent.pl