Расейцы спрабавалі завезці ў Беларусь мяккую цацку з гашышам
7- 17.02.2015, 19:04
- 10,488
Больш за паўтысячы таблетак з трамадолам і гашыш знойдзены ў асабістых рэчах грамадзян РФ.
Інцыдэнт адбыўся ўначы 17 лютага ў аўтадарожным пункце пропуску "Берасце". Дзве групы расейцаў чачэнскай нацыянальнасці на мікрааўтобусах «Мэрсэдэс» і «Рэно» з нумарамі французскай рэгістрацыі праходзілі афармленне на ўезд на чырвоным канале. Па заканчэнні працэдуры і падачы падарожнікамі мытнай дэкларацыі памежнікі наважылі накіраваць транспартныя сродкі ў бокс для спецыяльнага дагляду, паведамляе БелТА.
У салоне аўто і асабістых рэчах пасажыраў былі выяўленыя таблеткі, якія змяшчаюць забароненае да ўвозу ў Беларусь рэчыва «трамадол». Усяго было канфіскавана 529 таблетак. Акрамя таго, у салоне аднаго з аўтамабіляў знаходзілася мяккая цацка, усярэдзіне якой быў знойдзены поліэтыленавы мяшок з 20 міні-скруткамі фольгі, як меркуецца, з гашышам. Таблеткі і скруткі канфіскаваныя. Праводзіцца экспэртыза.
З пачатку года на дзялянцы Берасцейскай памежнай групы зафіксавана ўжо 9 спробаў правозу забароненых прэпаратаў. Характэрным у шэрагу затрыманняў з'яўляецца тое, што гэтыя спробы робяць эмігранты з Расеі, якія стала пражываюць у краінах ЕЗ.