ЕЗ спадзяецца на газ з Азербайджана і Туркменістана

Еўропа развязвае праблему дыверсіфікацыі паставак газу.

Ужо ў 2015 годзе ЕЗ мае намер развязаць пытанне павышэння "ўстойлівасці" забеспячэння Ашхабадам і Баку Еўропы газам, піша Deutsche Welle са спасылкай на Spiegel Online.

Развязваючы праблему дыверсіфікацыі паставак газу ў Еўропу, Еўракамісія гатовая фарсіраваць укладанне пагадненняў з такімі краінамі, як, напрыклад, Азербайджан і Туркменістан. Пра гэта са спасылкай на два дакументы, падрыхтаваныя для Энэргетычнага звяза ЕЗ, які ў будучыні стане рэгуляваць супрацоўніцтва ў энэргетычных пытаннях.

Згодна з гэтымі дакументамі, ужо ў гэтым годзе ЕЗ мае намер падпісаць з Баку і Ашхабадам мемарандумы аб узаемаразуменні, якія павінны стаць часткай пакета павышэння "ўстойлівасці" забеспячэння Еўропы прыродным газам. Гэты пакет Еўразвяз хацеў бы распрацаваць да 2016 года.

"ЕЗ будзе выкарыстоўваць усе замежнапалітычныя інструменты, каб умацаваць стратэгічнае энэргетычнае партнёрства з краінамі-вытворцамі і транзіцёрамі", - цытуе дакумент Spiegel Online. Да іх належаць Алжыр і Турцыя, Азербайджан і Туркменістан, Блізкі Усход і некалькі афрыканскіх краін. Праект таксама мае на ўвазе інтэнсіфікацыю партнёрства з Нарвегіяй, ЗША і Канадай.

Як адзначае выданне, некаторыя са згаданых партнёраў выглядаюць вельмі сумнеўна. Туркменістан валодае ледзь не найбуйнейшымі ў свеце запасамі газу, але ў той жа час ва ўладзе ў Ашхабадзе знаходзіцца дыктатарскі рэжым, а паводле рэйтынгу міжнароднай арганізацыі Transparency International, краіна ўваходзіць у дзясятку найбольш карумпаваных дзяржаў на Зямлі. Азербайджан займае 162-е месца з 180 у рэйтынгу свабоды прэсы, які складаецца міжнароднай арганізацыяй «Рэпарцёры без межаў».