На мітынг «рабоў валютнай гіпатэкі» ў Маскве выйшлі тысячы чалавек

Пазычальнікі валютнай гіпатэкі патрабавалі палегчыць ім умовы выплаты крэдытаў.

Праз двухразовае падзення рубля выплаты для шмат каго з іх сталі надмернымі, дапамога ж дзяржавы пакуль мае рэкамендацыйны характар, піша РБК.

Пазычальнікі ў чорных футболках з надпісамі "Раб валютнай гіпатэкі" разгарнулі шматлікія плакаты з лозунгамі: "Дзяржава падтрымае пазычальнікаў або чарговым разам банкі?", "Мы грошай не просім - мы за справядлівую рэструктурызацыю", "Валютная гіпатэка - гэта генацыд сярэдняга класа" , "Нам патрэбен закон, а не рэкамендацыі ЦБ", "Банк - душасмок" ды іншыя. Паводле звестак арганізатараў - Усерасейскага руху валютных пазычальнікаў - сабралася блізу 3,5 тысяч чалавек.

Сабраныя заяўлялі, што шмат каго з іх сумы выплат ужо перасягаюць даход, пачаліся пратэрміноўкі, банкі распачынаюць судовыя працэсы, але рэальныя крокі для ўрэгулявання сітуацыі ні дзяржавай, ні банкамі так і не зробленыя. Адной з мэт акцыі быў збор подпісаў пад зваротамі да Дзярждумы, ураду і адміністрацыі прэзідэнта Расеі з "просьбай пачуць голас пазычальнікаў".

Мяркуючы з заяў выступоўцаў, відавочна, кампрамісы ў плане рэструктурызацыі крэдытаў дагэтуль у большасці выпадкаў не знойдзеныя, хоць перамовы вядуцца з лістапада мінулага года.

Захады для падтрымкі гіпатэчных пазычальнікаў з боку дзяржаўных органаў пакуль маюць рэкамендацыйны характар. 23 студзеня Банк Расеі апублікаваў ліст з рэкамендацыямі банкам аб рэструктурызацыі валютнай гіпатэкі. Банкам прапанавалі пералічыць крэдыты ў рублі паводле курсу ЦБ на 1 кастрычніка 2014 года (39,38 рублёў за даляр) паводле ставак, сувымерных з тымі, з якімі выдаецца гіпатэка ў нацыянальнай валюце. Але банкі не спяшаюцца выконваць гэтыя рэкамендацыі, бо ўлады не маюць намераў кампенсаваць адмоўную курсавую розніцу.