Магерыні пра «план Мэркель-Аланда»: Мы павінны паспрабаваць

ЕЗ ахвочы рабіць усё магчымае для дыпламатычнага ўрэгулявання ўкраінскага канфлікту, аднак пакуль незразумела, які будзе вынік гэтых намаганняў.

Пра гэта заявіла кіраўніца еўрапейскай дыпламатыі Фэдэрыка Магерыні, піша "Корреспондент".

"Наш прыярытэт - актыўная дыпламатыя. Мы выкарыстоўваем усе фарматы, усе каналы для спроб знайсці развязанне канфлікту", - сказала яна на канферэнцыі ў Мюнхэне.

Паводле ейных слоў, у ЕЗ пакуль няма ўпэўненасці, што ініцыятыва аб Украіне прэзідэнта Францыі Франсуа Аланда і канцлеркі Нямеччыны Ангелы Мэркель спрацуе. "Мы не ведаем, ці скончыцца гэта поспехам, але мы павінны паспрабаваць", - падкрэсліла Магерыні.

Яна таксама адзначыла, што адным з прыярытэтаў ЕЗ з'яўляецца дапамога Украіне ў правядзенні рэформаў. "Мы хочам пераканацца, што Украіна стане спраўна дзейнай дзяржавай, што гэта будзе асобнай "гісторыяй поспеху", - дадала яна.

Так, мірны план для Украіны канцлеркі Нямеччыны Ангелы Мэркель і прэзідэнта Францыі Франсуа Аланда прадугледжвае стварэнне дэмілітарызаванай зоны і шырокую аўтаномію для Данбаса, піша РІА "Новости".

Нагадаем, у пятніцу ў Крамлі адбылася сустрэча сам на сам прэзідэнта Расеі Уладзіміра Пуціна з канцлеркай Ангелай Мэркель і кіраўніком Францыі Франсуа Аландам. Пасля чатырохгадзінных перамоў лідэры Мэркель і Аланд з'ехалі без заяў журналістам, піша "Інтэрфакс".

Прэс-сакратар Пуціна заявіў, што стораны рыхтуюць дакумэнт для імплемэнтацыі менскіх дамоўленасцяў. Чакаецца, што ў нядзелю Пуцін, Мэркель і Аланд правядуць тэлефонныя перамовы.