Медыцына для алкаголікаў будзе платнай
36- 26.03.2015, 15:09
- 22,167
Беларускія «дэпутаты» ініцыююць узмацненне жорсткасці антыалкагольнага заканадаўства.
Беларускія «дэпутаты» ініцыююць узмацненне жорсткасці антыалкагольнага заканадаўства.
Пра гэта паведаміў намеснік старшыні сталай камісіі ў пытаннях экалогіі, прыродакарыстання і чарнобыльскай катастрофы «палаты прадстаўнікоў» Мікалай Іванчанка сёння на пасяджэнні Менаблвыканкама, дзе разглядалася рэалізацыя ў рэгіёне патрабаванняў Дырэктывы №1 «Аб захадах ва ўмацаванні грамадскай бяспекі і дысцыпліны», піша БелТА.
Мікалай Іванчанка звярнуў увагу, што ўжыванне алкаголю часцяком прыводзіць да гібелі людзей і траўматызму, у тым ліку на вытворчасці. Колькасць спажыванага алкаголю на душу насельніцтва скарачаецца, аднак прыкладаемых для гэтага захадаў недастаткова, мяркуе дэпутат.
- Патрэбна больш дзейсная, больш сістэмная работа ў супрацьдзеянні распаўсюджванню і ўжыванню алкаголю. Гэта абмежаванне продажу алкаголю асобам, маладзейшым за 21 год, заканадаўчае вызначэнне максімальнай крэпасці піва, абмежаванне яго рэкламы, - адзначыў ён.
Акрамя таго, дэпутат прапанаваў скаардынаваць намаганні ўсіх узроўняў улады пры правядзенні «Дзён цвярозасці».
- У адным раёне праходзіць такая акцыя, а ў суседнім - не, і туды едуць закупляць спіртныя напоі. Гэтая праца не ўзгодненая, - мяркуе ён.
Таксама сярод прапанаваных захадаў - абавязаць асоб, якія злоўжываюць алкаголем, удзельнічаць у фінансаванні свайго лячэння.
- Думаю, трэба ўжо цяпер ініцыяваць стварэнне рабочай групы для распрацоўкі наступнай антыалкагольнай праграмы на 2016-2020 гады. Мяркую, да гэтай працы павінны актыўна падключыцца і ўнесці канкрэтныя прапановы спецыялісты Менаблвыканкама. Калі мы не створым моду на цвярозы лад жыцця, то сумная статыстыка, звязаная з наступствамі ўжывання алкаголю, будзе захоўвацца, - сказаў Мікалай Іванчанка.