Польшча ўзмоцніць войска на ўсходзе краіны

Праца над планам, якія прадугледжвае ўзмацненне войска на ўсходзе Польшчы, падыходзіць да канца.

Пра гэта заявіў намеснік міністра абароны Польшчы Чэслаў Мрочак. Паводле ягоных слоў, 27 траўня павінна адбыцца адная з апошніх сустрэч каманды, якая рыхтуе рэкамендацыі для міністра абароны, паведамляе "Украінская праўда" са спасылкай на Onet.pl.

"Задума такая, каб павялічыць укамплектаванне і эфектыўнасць злучэнняў на ўсходзе краіны", - сказаў ён.

Мрочак таксама дадаў, што праграма, хутчэй за ўсё, ахопіць першую танкавую брыгаду, якая дыслакаваная ў Варшаве-Веселай, Замосці, Хельме і Седльцэ.

Аб планах умацавання ўсходняй мяжы заявіў восенню міністр абароны Польшчы Томаш Семаняк.

"Сёння, гэтая ўсходняя сцяна нам вельмі патрэбная, і ў нас ёсць добры пункт для выхаду, а над дэталямі мы будзем працаваць. Я азнаёміўся з інфраструктурай, яна вельмі састарэла, бо на працягу доўгіх гадоў тут не было ніякіх інвестыцый. Дарогі і дамы ў дрэнным стане, такім чынам, гэтым таксама трэба заняцца", - казаў тады ён.