БГК згуляе ў фінале SEHA-лігі
- 6.03.2015, 14:05
- 3,592
У гэтым годзе ў вызначальным раўндзе міжнароднай гандбольнай SEHA-лігі возьмуць удзел не чатыры, а шэсць каманд.
Такая пастанова напярэдадні прынятая кіраўніцтвам лігі, паведамляе БелТА.
Такім чынам, у фінальным розыгрышы, незалежна ад зыходу астатніх трох тураў першага этапу, возьме ўдзел Берасцейскі гандбольны клуб імя Мяшкова. Месца ў «Фінале шасці» таксама сабе ўжо забяспечылі вугорскі «Веспрэм», які будзе гаспадаром фіналу, македонскі «Вардар», харвацкі «Заграб» і славацкі «Татран».
На апошні тур прэтэндуюць македонскі «Металург» і харвацкі «Нексе».
«Фінал шасці» пройдзе 25-29 сакавіка.
БГК у трэці раз гуляе ў SEHA-лізе. У дэбютным сезоне-2012/2013 берасцейцы сталі пераможцамі рэгулярнага чэмпіянату, але ў «фінале чатырох» былі апошнімі, саступіўшы ў паядынку за 3-е месца «Металургу». У мінулым сезоне БГК дайшоў да фіналу турніру, дзе саступіў «Вардару».