Adidas зліквідуе 200 крам у Расеі
12- 6.03.2015, 19:54
- 17,181
Кампанія тлумачыць гэта дэвальвацыяй рубля і скарачэннем спажывецкіх выдаткаў расейцаў.
Нямецкі вытворца спартовага адзення Adidas абвясціў аб будучай ліквідацыі 200 крам у Расеі ў варунках імклівай дэвальвацыі рубля і скарачэння спажывецкіх выдаткаў у сувязі з эканамічным крызісам, перадае «Голас Амэрыкі».
На працягу 2015 года Adidas зліквідуе 200 крам у Расеі, але ў той жа час створыць 100 новых гандлёвых пунктаў. Пра гэта абвясціў журналістам генэральны дырэктар кампаніі Гербэрт Гайнэр, пасля таго як кампанія здала справы аб выніках сваёй дзейнасці ў 2014 годзе.
Adidas стаў чарговай заходняй кампаніяй, што абвясціла аб скарачэнні сваёй прысутнасці ў Расеі пасля падзення рубля да даляра на 40% летась.
Паводле прагнозаў аналітыкаў, расейская эканоміка сёлета можа скараціцца на 4%.
«Скарачэнне базы крам на рынку негатыўна адаб'ецца на продажу», - гаворыцца ў штогадовай справаздачы Adidas, апублікаванай у чацвер.
«Мы абсалютна ўпэўненыя ў доўгатэрміновым патэнцыяле рынку, але кароткатэрміновы падмурак для вядзення бізнэсу істотна змяніўся праз імклівае абясцэньванне расейскага рубля ў 2014 годзе і значную рызыку далейшага скарачэння спажывецкіх выдаткаў», - гаворыцца ў справаздачы.
За апошнія месяцы дзясяткі заходніх раздробных кампаній абвясцілі аб скарачэнні прысутнасці на расейскім рынку.