Крыніца ў NATO: Расея перакідвае на Данбас танкі і войскі
7- 12.04.2015, 8:43
- 35,650
Нягледзячы на спыненне агню, з Расеі на Данбас прадаўжаюць паступаць войскі і зброя.
З такой заявай выступіла 11 красавіка нямецкае выданне Frankfurter Allgemeine Zeitung, спаслаўшыся на крыніцы ў NATO, піша Lenta.ru.
«Мы працягваем бачыць падтрымку сепаратыстаў з боку Расеі зброяй, вайскоўцамі і падрыхтоўкай кадраў. Расея перамяшчае войскі і тэхніку праз адкрытую мяжу з Украінай», - прыводзіць газета словы крыніцы.
Выданне сцвярджае, што ў сепаратыстаў цяпер у распараджэнні больш расейскай зброі, чым было на момант укладання другога менскага пагаднення. З яго звестак, апалчэнцы атрымліваюць танкі, БТРы, артылерыю і сістэмы СПА. У тым ліку, ім пастаўляюцца сучасныя мадэлі танкаў Т-80 і Т-90.
Прадстаўнікі NATO ўжо не раз заяўлялі аб наяўнасці расейскіх войскаў на тэрыторыі Украіны. Прынамсі, генеральны сакратар NATO Енс Столтэнберг у інтэрв'ю ад 31 студзеня 2015 аргументаваў гэта тым, што апалчэнцы не могуць сабе дазволіць мець у арсенале такое сучаснае ўзбраенне.
Фота: Reuters