Ноччу ў Кіеве каля аддзялення банка прагрымеў выбух

Сёння ноччу ў Кіеве каля ўваходу ў аддзяленне філіяла аднаго з банкаў адбыўся выбух.

Пра гэта паведамляе прэс-служба МУС Украіны.

«А 04:13 паступіла паведамленне, што каля дзвярэй цэнтральнага ўваходу ў аддзяленне філіяла аднаго з банкаў на вуліцы Баршчагоўскай адбыўся выбух. Паводле папярэдняй інфармацыі, спрацавала неўстаноўленае выбуховае прыстасаванне», - сказана ў паведамленні.

Выбуховай хваляй былі пашкоджаныя металапластыкавыя канструкцыі і шкло двух вітрынных вокнаў і ўваходных дзвярэй. Ніхто не пацярпеў.

На месцы здарэння спецыялісты выбухатэхнічнай службы МУС канфіскавалі фрагменты невядомых прадметаў, якія накіраваныя на экспертызу.