Карэспандэнта агенцтва «Расея сёння» пазбавілі віду на жыхарства ў Польшчы

Мазавецкае ваяводства Польшчы пазбавіла пазаштатнага карэспандэнта агенцтва «Расея сёння» Леаніда Свірыдава віду на жыхарства ў краіне.

Пра гэта журналіст паведаміў ТАСС.

«Адміністрацыйная пастанова ваяводы была перададзеная майму адвакату асабіста», - сказаў Свірыдаў. Ён заявіў, што мае намер аспрэчваць дзеянні польскіх уладаў.

Разгляд справы быў адкладзены ў сярэдзіне красавіка ў сувязі з паступленнем новых дакументаў ад польскага Агенцтва ўнутранай бяспекі (АУБ). Журналіст не змог азнаёміцца з пераважнай часткай гэтых матэрыялаў, бо яны засакрэчаныя. Са слоў Свірыдава, два дакументы, якія яму ўдалося вывучыць, не ўтрымлівалі інфармацыі аб прычынах, паводле якіх АВБ запатрабавала пазбаўлення яго віду на жыхарства. Як паведамляў «Інтэрфакс» са спасылкай на мясцовыя СМІ, расейскага карэспандэнта падазраюць у шпіянажы.

Справа аб пазбаўленні Свірыдава віду на жыхарства разглядаецца з кастрычніка 2014 года. Тады МЗС Польшчы з падачы АВБ анулявала акрэдытацыю журналіста, якая перад гэтым падаўжалася ў студзені таго ж года. Расейскае МЗС назвала дзеянні Варшавы ў дачыненні да карэспандэнта нахабнымі і запатрабавала тлумачэнняў. Свірыдаў працуе ў сталіцы Польшчы з 2003 года.