Беларусь спыніла пастаўкі нафтапрадуктаў у Расею
2- 3.04.2015, 15:27
- 15,978
Пастаўкі нафтапрадуктаў у Расею спыненыя ў чаканні спрыяльнай коштавай кан'юнктуры.
Пра гэта сёння журналістам паведаміў намеснік прэм'ер-міністра Уладзімір Сямашка, паведамляе БелТА.
Гаворачы аб пастаўках нафтапрадуктаў у Расею, віцэ-прэм'ер адзначыў, што ў гэтай частцы ёсць нюансы ў сувязі з падзеннем курсу расейскага рубля. «Расея вытрымлівае сваю коштавую палітыку, сёння кошты не растуць, у тым ліку на паліва. Калі нядаўна кошт бензіну даходзіў да 90 цэнтаў за літр, то сёння - 50-54 цэнты ў залежнасці ад маркі бензіну», - сказаў ён.
«У гэтай сітуацыі для нас пастаўка ў Расею асобных бензінаў дае страту прыкладна ў $100 на тону. Мы не можам сабе гэтага дазволіць, таму скарысталіся становішчам, якое прапісана ў дамове аб стварэнні ЕАЭС. Калі кошт на нафтапрадукты ніжэйшы за той, па якім можна прадаць іх на іншых рынках, мы маем права часова такія прадукты не пастаўляць», - адзначыў Уладзімір Сямашка, дадаўшы, што расейскі бок паставіўся да гэтага з разуменнем.
«Зменіцца кан'юнктура, кошты вырастуць, значыць, мы будзем пастаўляць», - падкрэсліў віцэ-прэм'ер.
Пры гэтым ён праінфармаваў, што баланс паставак нафты і нафтапрадуктаў на другі квартал ужо падпісаны. Забяспечаная 100-адсоткавая загрузка нафтай беларускіх заводаў.