Нацбанк пазычыць валюту ў беларусаў
5- 30.04.2015, 21:41
- 179,422
Нацбанк ізноў вярнуўся да непублічнага размяшчэння валютных аблігацый на ўнутраным рынку для рэфінансавання сваіх пазыковых абавязанняў.
Рэгулятар актыўна выкарыстаў гэты метад рэфінансавання валютных абавязанняў у мінулым годзе, але зрабіў паўзу ў 1-м квартале гэтага года. Такі метад запазычанняў не выклікае адабрэння з боку міжнародных крэдытораў, у сувязі з чым Нацбанк РБ перад сакавіцкімі місіямі МВФ і АКФ ЕўрАзЭС пастанавіў не выпрабоўваць лёс сінявокай, піша АФН.
Місіі з'ехалі. Валюта патрэбная як ніколі - толькі за красавік Нацбанк паспеў размясціць тры выпускі валютных аблігацый.
Так 7 красавіка рэгулятар прадаў 6-ы выпуск валютных аблігацый на суму 15 млн еўраў з тэрмінам абарачэння 1 год і прыбытковасцю 5,895% гадавых.
Затым, 27 красавіка рэгулятар прадаў 7 выпуск аднагадовых аблігацый на суму 20 млн даляраў з прыбытковасцю 8,40155% гадавых.
На наступны дзень, 28 красавіка сышоў 8-ы выпуск валютных аблігацый (1 год) на суму 30 млн еўраў з прыбытковасцю 7,87357% гадавых.
Валюта патрэбна Нацбанку для закрыцця валютных пазык, якіх рэгулятар нахапаўся яшчэ ў перыяд валютнага голаду 2011 года на фоне трохразовай дэвальвацыі рубля.
Рэгулятар не паведамляе і не каментуе размяшчэння валютных аблігацый.