Памочнік генеральнага сакратара NATO: Войскі РФ здольныя ўварвацца ва Украіну ў сціслыя тэрміны

Альянс выказаў занепакоенасць у сувязі з прысутнасцю расейскіх узброеных сіл па абодва бакі расейска-ўкраінскай мяжы.

Пра гэта ў інтэрв'ю выданню "Апостроф" паведаміў памочнік генеральнага сакратара NATO Трасівулас Стаматопулас.

"Цягам апошніх некалькіх месяцаў Расея перадала сепаратыстам больш за тысячу адзінак цяжкага ўзбраення. А значныя ў колькасці войскі, дыслакаваныя ў памежных зонах на тэрыторыі Расеі, здольныя ўварвацца на тэрыторыю Украіны ў сціслыя тэрміны, як гэта здарылася ў мінулым годзе ў Крыме", - сказаў ён.

Таксама Стаматопулас нагадаў словы генеральнага сакратара NATO Енса Сталтэнберга аб тым, што такая прысутнасць расейскіх войскаў з'яўляецца сродкам застрашвання і ціску на Кіеў і Украіну.

"Такім чынам, ужо сама такая ваенная прысутнасць уяўляе сабой праблему. І хоць Расея і падтрыманыя ёю сепаратысты размяшчаюць сродкамі для правядзення новых нападаў у сціслыя тэрміны, мы аддаём перавагу ўстрымлівацца ад здагадак што да іх магчымых намераў. Пры гэтым нас рэальна турбуе тое, што цягам доўгага перыяду часу мы назіраем сталае нарошчванне вайсковай моцы", - рэзюмаваў памочнік генеральнага сакратара NATO.

Нагадаем, учора ў авіяцыі і войсках СПА Цэнтральнай вайсковай акругі РФ згодна з загадам Уладзіміра Пуціна пачатая раптоўная праверка боегатоўнасці. З 13:00 25 траўня ў поўную баявую гатоўнасць прыведзенае аб'яднанае стратэгічнае камандаванне "Цэнтр", 2-е камандаванне ВПС і СПА, а таксама частка авіяцыйных злучэнняў камандавання Далёкай авіяцыі Заходняй і Паўднёвай вайсковых акругаў.

Папярэдняя раптоўная праверка боегатоўнасці ВС РФ праводзілася з 16 да 21 сакавіка, асноўны акцэнт у ёй быў зроблены на адпрацоўцы і забеспячэнні баявых дзеянняў у Арктыцы. У яе ўключаліся сілы Паўночнага флоту, Заходняй вайсковай акругі і ПДВ, усяго блізу 80 тысяч вайскоўцаў, некалькі тысяч адзінак наземнай баявой тэхнікі, дзясяткі надводных караблёў, субмарын, самалётаў і гелікаптэраў.