На месцы гістарычнай забудовы Нямігі будуюць гатэль

На тэрыторыі, схаванай ад мінакоў дамамі на вуліцах Рэвалюцыйнай і Нямізе, актывізаваліся будаўнічыя работы, з'явіўся вежавы кран.

Тут узводзяць чарговы гатэль, і, мяркуючы па ўсім, зняць у ім нумар зможа не кожны сярэднестатыстычны турыст. У элітным гатэлі размесціцца не больш за 10 апартаментаў з усімі выгодамі, а на верхніх паверхах - з выхадам на тэрасу, піша onliner.by.

Калісьці на месцы будпляцоўкі стаялі жылыя дамы. Іх прызналі аварыйнымі, жыхароў рассялілі па іншых раёнах Менска, а будынкі знеслі.

Будаўніцтва гасцініцы разгарнулася на месцы, дзе стаяў дом №24а. Нягледзячы на тое, што будынак узводзіцца з нуля, на пашпарце аб'екта працэс чамусьці назвалі рэканструкцыяй: «Рэканструкцыя помніка архітэктуры XIX-XX стагоддзяў - будынка па вуліцы Рэвалюцыйнай, 24а пад гасцініцу». Заказчык - ТАА «Тэкстур».

Архітэктурная канцэпцыя будынка была распрацавана ў 2012 годзе вядомай кампаніяй «Вараб'ёў і партнёры». Яе аўтарству належыць дызайн многіх іншых аб'ектаў у Менску. Гэта і шматфункцыянальны комплекс «Сокал» на праспекце Пераможцаў, і офіс Банка развіцця на праспекце Машэрава, і гасцінічна-дзелавы цэнтр Hampton by Hilton на вуліцы Талстога.

Характэрна, што на ўзвядзенне новага камерцыйнага аб'екта знайшліся і фінансы, і магчымасці. А стан дамоў на вуліцы Рэвалюцыйнай, у адной з самых ажыўленых частак горада, дагэтуль застаецца сумным.

Таксама гарадскія ўлады чамусьці не спяшаюцца «ажывіць» або хоць неяк вырашыць лёс дома №32, на якім некалькі гадоў таму ўтварыліся небяспечныя расколіны. Як мяркуецца, будынак пайшло па швах праз будаўніцтва шматфункцыянальнага комплексу на вуліцы Нямізе.

Звязацца з кампаніяй «Тэкстур», каб удакладніць тэрміны здачы апарт-гатэля, не ўдалося. Але ўлічваючы досвед іншых менскіх забудоўшчыкаў і сённяшні стан будпляцоўкі, наўрад ці гэта здарыцца ў лістападзе 2015 года, як паказана на пашпарце аб'екта.