Найбуйнейшыя банкі свету ўцягнутыя ў карупцыйны скандал з FIFA

Хабары, якія, са сцвярджэння амерыканскіх пракурораў, атрымлівалі функцыянеры FIFA, перасылаліся праз рахункі, адкрытыя ў найбуйнейшых амерыканскіх, швайцарскіх і брытанскіх банках.

Гэта вынікае з тэксту абвінавачванні, падрыхтаванага міністэрствам юстыцыі ЗША.

У ім пералічваюцца такія банкі, як JPMorgan Chase, Citigroup, HSBC, Bank of America, UBS і Julius Baer, пішуць «Ведомости» са спасылкай на The Financial Times.

У сераду мінюст ЗША выставіў абвінавачванні дзевяці чыноўнікам ФІФА і пяці топ-мэнэджарам спартыўных кампаній, заявіўшы, што яны былі часткай схемы, у рамках якой больш за $150 млн было выплачана ў выглядзе хабараў за атрыманне камерцыйных правоў, звязаных з турнірамі ў футболе.

Федэральныя пракуроры праводзяць праверку ў дачыненні да фінансавых інстытутаў, каб зразумець, ці ведалі яны пра тое, што дапамагаюць адмываць грошы, якія выкарыстоўваліся для подкупу, заявіла Кэлі Кэры, выканаўца абавязкаў пракурора ўсходняй акругі Нью-Ёрка.

Многія з грашовых пералічэнняў, пра якія гаворыцца ў абвінавачванні, перасягалі $1 млн. У 2013 з рахунку Citibank у Маямі, які належыць спартыўнай маркетынгавай кампаніі Traffic USA, было адпраўлена $11 млн, якія пракуроры ўвязваюць з аплатамі пяці кантрактаў. Грошы былі адпраўленыя на рахунак Канфедэрацыі футбола Паўночнай і Цэнтральнай Амерыкі і краін Карыбскага басейна (CONCACAF) у нью-ёркскім аддзяленні JPMorgan Chase.

У іншым выпадку ў лістападзе 2012 Traffic International пералічыла $1,2 млн з рахунку Delta National Bank & Trust у Маямі на карэспандэнцкія рахункі HSBC у Буфала, шт. Нью-Ёрк; затым гэтыя грошы былі спісаныя на карысць падстаўной кампаніі, якая мела рахунак у ганконгскім аддзяленні HSBC.

Delta National Bank неаднаразова згадваецца ў тэксце абвінавачання, нароўні з Banco do Brasil, філіялы якога ў Нью-Ёрку і Парагваі таксама, на думку пракурораў, выкарыстоўваліся для пералічэння хабараў. У 2004 $1,2 млн быў пералічаны з рахунку Traffic International у Delta National Bank на карэспандэнцкія рахункі ў нью-ёркскім аддзяленні Banco do Brasil. Гэтая сума затым была спісаная на карысць рахунку ў парагвайскім аддзяленні Banco do Brasil, які належыць Паўднёваамерыканскай канфедэрацыі футбола (CONMEBOL).