Мікалай Аўтуховіч: Самы лепшы адказ на рэпрэсіі ўладаў - байкот «выбараў»

І чым больш людзей не прыйдзе на «выбары» - тым лепш. Гэтага ўлада сапраўды баіцца.

Такое меркаванне выказаў у інтэрв'ю charter97.org былы палітвязень Мікалай Аўтуховіч.

- Учора ў Пружанах суд прысудзіў Юрыя Рубцова да двух гадоў калоніі. Калісьці такі палітычна матываваны прысуд быў зачытаны і ў дачыненні да вас. На вашу думку, нешта змянілася ў Беларусі за гэты час?

- Вельмі непрыемна наогул пра гэта казаць. З таго часу, як я на волі, я імкнуся «не лезці на ражон», стараюся рабіць так, каб мяне не было за што «зачапіць». Таму што, на самай справе, нічога не змянілася, і мяне вельмі проста могуць зноў пасадзіць у турму. А што тычыцца справы Юрыя Рубцова - аб справядлівасці тут не можа быць і гаворкі. І можна было загадзя выказаць здагадку: чалавек зрабіў тату «Лукашэнка, сыходзь», суддзі не могуць пакінуць яго на волі. Яны баяцца, што і іх за гэта асудзяць, калі яны не асудзяць Юрыя Рубцова. Усё трымаецца на страху. Улада трымаецца выключна на гэтым адміністрацыйным рэсурсе. На ўсіх узроўнях чыноўнікі паказваюць, якія яны добрыя работнікі, абараняючы гэтую ўладу.

- У кантэксце міжнародных падзей, між іншым, запрашэнне Беларусі на саміт «Усходняга партнёрства», гэты прысуд набывае нейкае асаблівае гучанне?

- Улада заўсёды заяўляла, што ў нас нібыта няма палітвязняў. І тое, што на гэтым саміце Макей сказаў - гэта не навіна. Колькі ні насядаў Захад, ні насядалі Амерыка - адказ у Беларусі заўсёды быў адзін: «У нас няма палітвязняў». Тое ж самае яны кажуць і цяпер... Якія могуць быць паляпшэнні ў галіне правоў чалавека, калі ў краіне наогул не відаць нейкіх рухаў у гэтым пытанні? Апазіцыйныя дзеячы павінны выстаўляць выразныя патрабаванні і ўльтыматумы ўладзе. Захад бачыць, што не ўсе цвёрда стаяць на гэтай пазіцыі. Гэта таксама спараджае сумневы ў заходніх палітыкаў. Ні адна з умоў, ні адно з патрабаванняў не было выкананае ўладай. Зноў жа, з'явіліся нейкія кандыдаты на «выбары»... Зразумела, што гэта будуць за «выбары» - і ўсё роўна ідуць на іх. Відавочна ж, што самы лепшы адказ - гэта байкот. І чым больш людзей не прыйдзе на выбары - тым лепш. Гэта, бадай, адзінае, чаго ўлада сапраўды баіцца. А пра тых «лідараў», якія пойдуць на выбары, я наогул не хачу казаць.

Нагадаем, што 28 траўня суд Пружанскага раёна завяршыў разгляд справы супраць гомельскага актывіста Юрыя Рубцова, абвінавачанага паводле артыкула 415 Крымінальнага кодэкса (ухіленне ад адбыцця пакарання ў выглядзе абмежавання волі) за тое, што ён неаднаразова адмаўляўся ад месцаў працаўладкавання, што прапаноўваліся яму, падчас адбыцця пакарання ў папраўчай установе адкрытага тыпу (ПУАТ) у вёсцы Куплін (Пружанскі раён Берасцейскай вобласці). Суддзя Мікалай Рэпіха прысудзіў апазіцыянера да двух гадоў зняволення ў калоніі агульнага рэжыму з улікам неадбытага тэрміну. Юры Рубцоў заявіў, што будзе абскарджваць прысуд, які ён уважае несправядлівым.

Мікалай Аўтуховіч двойчы асуджаўся па палітычных матывах. Першы раз яго арыштавалі ў кастрычніку 2005 года, абвінаваціўшы ў нібыта невыплаце падаткаў, тады яго асудзілі на тры з паловай гады. Ён быў адным з шасці палітвязняў, вызваленых у выніку жорсткіх санкцый ЗША і Еўразвяза.

Другі раз Аўтуховіча арыштавалі 8 лютага 2009 года.

У траўні 2010 года за перавозку і захоўванне пяці патронаў да паляўнічай вінтоўкі Вярхоўны суд Беларусі прызнаў яго вінаватым па частцы 3 артыкула 295 Крымінальнага кодэкса (незаконныя дзеянні ў дачыненні да агнястрэльнай зброі, боепрыпасаў і выбуховых рэчываў) і прыгаварыў да пяці гадоў двух месяцаў пазбаўлення волі ва ўмовах строгага рэжыму.

Праваабаронцы прызналі Аўтуховіча палітвязнем, асуджаным за сваю актыўную грамадскую дзейнасць і барацьбу з карупцыяй. Акрамя таго, падчас суда над ім былі дапушчаныя сур'ёзныя працэсуальныя парушэнні.

У студзені 2012 года суд зрабіў больш жорсткімі Аўтуховічу ўмовы адбыцця пакарання, прызнаўшы яго «злосным парушальнікам рэжыму».

Асуджанага перавялі з калоніі №5 у Івацэвічах (Берасцейскай вобласць) у гарадзенскую турму №1.

Пасля вызвалення над палітвязнем Мікалаем Аўтуховічам на 16 месяцаў устаноўлены прэвентыўны нагляд.