Ад Беларусі ў ААН запатрабавалі вызвалення палітвязняў

Адбылося пасяджэнне Універсальнага перыядычнага агляду - найбольшага сусветнага маніторынгавага механізму правоў і свабод чалавека.

Упершыню з 2010 года ў цэнтры ўвагі - Беларусь. Галоўнымі праблемамі краіны ў сферы абароны правоў чалавека сёлета сталі палітычныя вязні, смяротнае пакаранне, катаванні, сумна вядомы артыкул 193-1, адсутнасць незалежнай судовай сістэмы і свабоды слова, паведамляе тэлеканал «Белсат».

Улады Беларусі запрасілі да кансультацый толькі зарэгістраваных і праўладных НДА. Астатнім арганізацыям, такім, як праваабарончы цэнтр «Вясна», зарэгістравацца перашкодзіла афіцыйная дэлегацыя. Нягледзячы на гэта, у Раду правоў чалавека накіравалі альтэрнатыўную справаздачу, складзеную адзінаццаццю няўрадавымі арганізацыямі.

Афіцыйная справаздача беларускай дэлегацыі была напоўненая аптымізмам: значныя дасягненні ў пытаннях сацыяльнага свету і адукацыі, гендэрнай роўнасці і гвалту ў сям'і.

Абмеркаванне нашай краіны пачалося станоўча - у нас адзін з самых нізкіх узроўняў дзіцячай смяротнасці ў свеце. На пасяджэнні чулася адабрэнне прынятых Беларуссю захадаў у барацьбе з гандлем людзьмі.

Аднак, амаль імгненна дыскусія перанеслася ў плоскасць крытыкі. Сярод традыцыйна заклапочаных суседзяў на еўрапейскім кантыненце ў дыскусію аб абароне правоў чалавека ў Беларусі нечакана ўключыліся Бразілія і Перу. Больш за сто краін агулам далі рэкамендацыі Беларусі ў пытаннях паляпшэння грамадзянскіх правоў і свабодаў. Прадстаўнік Ірландыі заклікаў пашыраць прымяненне беларускай мовы і забяспечыць яму належныя магчымасці для выкарыстання.

Прагучалі галасы за далучэнне Беларусі да Рымскага статусу Міжнароднага крымінальнага суда, канвенцыі супраць катаванняў і стварэння інстытута амбудсмена. Сябры ААН выказалі жаданне ўбачыць спрашчэнне рэгістрацыі палітычных партый і правядзення масавых сходаў.

Даходзіла да спрэчак. Бельгія заклікала ўлады супрацоўнічаць са спецыяльнымі спецдакладчыкамі пра Беларусь у пытаннях стану правоў чалавека. Нечаканасцю стала крытыка з боку Расеі. Усходняя суседка параіла уладам Беларусі абараняць сямейныя каштоўнасці і больш актыўна ўзмацняць супрацоўніцтва з грамадзянскай супольнасцю.

Прадстаўнік ЗША ў Радзе правоў чалавека ААН Кейт Харпер заклікала Менск удасканаліць сваё выбарчае заканадаўства, прывесці яго ў адпаведнасць з рэкамендацыямі АБСЕ, паведамляе «Радио Свобода».

«Напярэдадні прэзідэнцкіх выбараў-2015, Менск павінен прадэманстраваць павагу да дэмакратычнага палітычнага працэсу, свабоды асацыяцыяў, слова і меркаванняў», - адзначыла Харпер.