Лукашэнка: Чалавеку не патрэбны рост заробкаў, калі не растуць кошты

Дыктатар прызнаў, што на падвышэнне заробкаў грошай няма.

Аляксандр Лукашэнка паставіў задачу прыпынення росту коштаў на кантраляваных дзяржавай пазіцыях. Такое даручэнне ён даў 5 траўня, прымаючы з дакладам міністра працы і сацыяльнай абароны Мар'яна Шчоткіна, піша БелТА.

Аляксандр Лукашэнка адзначыў, што ў канцы мінулага года, пачатку гэтага ў краіне "супакоілі і валютны рынак, і кошты". У той жа час назіраецца падвышэнне коштаў на тавары і паслугі. Са слоў правадыра, гэтаму ёсць і аб'ектыўныя прычыны: рост курсу даляра ў дачыненні да беларускага рубля.

"Калі назіраецца рост коштаў на кантраляваных пазіцыях і асабліва ў ЖКГ, яшчэ дзесьці, там, дзе дзяржава падвышае кошты, - гэта недапушчальна. Таму што мы заробак сёння не можам падняць. Чалавеку не патрэбны рост заробкаў, калі не растуць кошты", - адзначыў ён.

"І там, дзе мы можам сёння прыпыніць рост коштаў, гэты рост коштаў трэба прыпыніць. Трэба даць зразумець усім: бізнэсоўцам, прадпрымальнікам, кіраўнікам дзяржпрадпрыемстваў і ўсім астатнім, што кошты пажадана цяпер не тузаць", - сказаў Лукашэнка.