Дэпутат-адзінарос ва Уладзівастоку спрабаваў пратараніць калону дэманстрантаў

У Прымор'і выбухнуў скандал вакол дэпутата мясцовага заканадаўчага сходу.

Чалец фракцыі «Адзінай Расеі» Артуш Хачатран падчас першатравеньскай дэманстрацыі паспрабаваў выехаць з двара праз перацятую вуліцу, па якой ішла калона людзей, піша gazeta.ru.

Парламэнтара не збянтэжыў чынны супраціў паліцыянтаў, якія стаялі ў ачапленні, і ён працягваў рух, нават калі тыя спрабавалі яго спыніць.

Паводле факту інцыдэнту рэгіянальная ўправа СКР праводзіць даследчую праверку - дэпутата падазраюць у абразе і ўжыванні гвалту да прадстаўнікоў улады. Сам ён спехам паляцеў на лячэнне за мяжу.