Працаўнікі МТЗ: На заводзе хаваюць ад Лукашэнкі трактары і зраўноўваюць асфальт для Колі

Каля прахадной Менскага трактарнага завода кіпіць праца: спецтэхніка, людзі ... Адны здзіраюць асфальт, іншыя фарбуюць сцены і бардзюры.

На тэрыторыі завода таксама мітусня - таксама «ірвуць» асфальт, фарбуюць аб'екты, косяць траву. Такое ажыўленне звязанае не з пазапланавым суботнікам, а з больш важнай падзеяй у вачах адміністрацыі: 15 траўня на завод павінен прыехаць Аляксандр Лукашэнка. Таму кіраўніцтва прадпрыемства дало загад схаваць у розных кутках і закутках прадукцыю - трактары «Беларусь», якія не знаходзяць збыту, паведамляе тэлеканал «Белсат».

Сёння супрацоўнікам прадпрыемства, якія прывыклі да доўгіх выходных на травеньскія святы, паведамілі, што з панядзелка па пятніцу прыйдзецца адпрацаваць цалкам - скарочанага працоўнага тыдня не будзе. Да гэтага часу на прадпрыемстве на працягу некалькіх месяцаў працавалі толькі 4 дні на тыдзень, а некаторыя цэхі наогул адправілі ў адпачынак з захаваннем 2/3 заробку. Работнікі, якія прасілі не называць іх прозвішчаў, кажуць, што хутчэй за ўсё, адміністрацыя накіруе іх на ўборку цэхаў і тэрыторыі. Большасць абураецца, што замест таго, каб хаваць прадукцыю, лепш бы паказалі Лукашэнку, што яе няма куды ўжо падзець.

«Заказаў няма, а прадукцыю выпускаюць, нягледзячы на тое, што і план ужо скарочаны. Які ў гэтым сэнс? Заробкі знізіліся. Прадукцыю прадаць немагчыма. Што будзе далей? Вось і паказалі б, якая тут сітуацыя. Дык не, будуць трактары хаваць за чыгункай, за цэхамі, за будынкамі, каб толькі на вочы не трапіліся», - наракае адзін з працаўнікоў.

Іншая працаўніца дадала: «Народ жартуе: маўляў, асфальт зраўноўваюць, каб Колю зручней было хадзіць, а то на нашых калдобінах можна і ногі паламаць. На прэміі грошай няма, а тут раптам знайшліся».