Газавыя перамовы паміж ЕЗ, Украінай і Расеяй пройдуць 29 чэрвеня

Размова на перамовах пойдзе, у тым ліку, аб аб'ёмах запампоўвання газу ва ўкраінскія газавыя сховішчы.

Трохбаковыя перамовы ў пытаннях арганізацыі паставак газу ва Украіну ў фармаце Украіна - Еўрапейскі Звяз - Расея на ўзроўні міністраў энэргетыкі Украіны і Расеі пры пасярэдніцтве Еўрапейскай камісіі адбудуцца 29 чэрвеня. Пра гэта паведаміў на брыфінгу міністр энэргетыкі і вугальнай прамысловасці Украіны Уладзімір Дзямчышын, піша УНІАН.

"Перамовы пройдуць 29 чэрвеня на ўзроўні міністэрстваў", - сказаў Дзямчышын.

Ён адзначыў, што размова на перамовах пойдзе, у тым ліку, аб аб'ёмах запампоўвання газу ва ўкраінскія газавыя сховішчы для праходжання ацяпляльнага сезона, а таксама для забеспячэння транзіту расейскага газу ў Еўропу.

Пры гэтым Дзямчышын падкрэсліў, што расейскі бок настойвае на запампоўцы 19 млрд кубаметраў пры тым, што цяпер ва ўкраінскіх ПСГ знаходзіцца прыблізна 11,5 млрд кубаметраў.

"Мы гатовыя пры наяўнасці сродкаў запампаваць 19 млрд кубаметраў. Але гэта не абавязкова", - сказаў Дзямчышын.