Бэльгія размарозіць рахункі расейскіх дыпмісій
- 30.06.2015, 19:54
- 25,560
Рахункі дыпламатычных прадстаўніцтваў Расеі ў Бэльгіі размарожаныя.
Пра гэта паведамляе РІА «Новости» са спасылкай на сталага прадстаўніка Расеі пры NATO Аляксандра Грушку.
«Рахункі дыпмісій разблакавалі, па-іншаму і быць не магло», - канстатаваў ён.
Судовы пераслед Расеі ў Еўропе стане зацяжным міжнародным скандалам.
18 чэрвеня МЗС Расеі выказаўся з нагоды замарозкі расейскіх рахункаў у Бэльгіі. Масква запатрабавала неадкладна аднавіць «нармальнае функцыянаванне расейскіх устаноў і юрыдычных асобаў». У адваротным выпадку, як адзначылі ў міністэрстве, у дачыненні да Бэльгіі могуць быць прыняты «адэкватныя захады ў адказ».
Арышты расейскага маёмасці пачаліся ў Бэльгіі 17 чэрвеня. Адзначалася, што адпаведная пастанова прынятая Сталай палатай трацейскага суда ў Гаазе паводле пазоваў трох кампаній (Hulley Enterprises, Yukos Universal Limited і Veteran Petroleum Ltd), якія прадстаўляюць былых акцыянераў ЮКАСа. Услед за Бэльгіяй арыштаваць расейскія актывы пастанавілі і французскія ўлады.
Згодна з пастановай міжнароднага суда ў Гаазе, Расея павінна выплаціць 50 мільярдаў даляраў тром кампаніям. Масква збіраецца аспрэчыць гэтую пастанову.
Нафтавая кампанія ЮКАС існавала з 1993 да 2007 года. 1 жніўня 2006 яна была прызнаная банкрутам, бо завінавацілася сіндыкату замежных банкаў амаль 500 мільёнаў даляраў. Пазней гэтую пазыку выкупіла «Раснафта». Цягам 2007 маёмасць ЮКАСа прадавалася на аўкцыёнах, а 21 лістапада таго ж года кампанія была ліквідаваная.