Gazeta Wyborcza: Сённяшняя слабасць Расеі дае новы шанец для Беларусі

Супраціў украінцаў расейскай агрэсіі не дазваляе Пуціну ліквідаваць Беларусь.

Пра гэта на старонках "Gazeta Wyborcza" піша журналіст Анджэй Пачобут, паведамляе ZN.ua.

Ён прыводзіць вынікі даследавання, паводле якіх 62% беларусаў уважаюць Крым за расейскі, 47% падтрымліваюць незалежнасць так званай "Наваросіі" і 51% выступаюць за інтэграцыю Беларусі з Расеяй, а не з ЕЗ. Аўтар падкрэслівае ўзмацненне прарасейскіх настрояў у Беларусі, якіх раней не было.

З ягоных слоў, у краіне з'явілася новая прарасейская большасць. З аднаго боку, гэта з'ява выкліканая і расейскай прапагандай. А з другога - дзяржаўная палітыка Аляксандра Лукашэнкі таксама гэтаму спрыяла апошнія два дзесяцігоддзі. Ён неяк сказаў, што "беларусы - гэта расейцы, толькі лепшыя". І гэты тэзіс абагульняе ягоную прарасейскую палітыку з першых дзён на пасадзе кіраўніка краіны.

Беларускі дыктатар заўсёды бачыў ворага ў нацыянальнай культуры і самабытнасці свайго народа. Ён адмовіўся ад нацыянальных сімвалаў і адзінай дзяржаўнай мовы, надаўшы афіцыйны статус расейскай. Тым самым ён загнаў беларусаў у расейскае "культурнае гета". Паводле статыстычных звестак, нават у школах расейская мова дамінуе. У беларускія школы ходзіць толькі кожны дзесяты школьнік, а на беларускай мове навучаюцца ўсяго 300 дзяцей.

"Такім чынам, Лукашэнка стаў закладнікам уласнай антыбеларускай палітыкі, - піша Анджэй Пачобут. - Яго турбуе культурная, эканамічная і палітычная экспансія суседняй краіны. Ён пайшоў на татальную эканамічную залежнасць ад Расеі дзеля гарантыі стабільнасці свайго аўтарытарнага рэжыму. Лукашэнка змагаўся з нацыянальнай беларускай ідэнтычнасцю, падмяняючы яе савецкай спадчынай і расейскай мовай. Такім чынам, ён пабудаваў у Беларусі меншую альтэрнатыўную Расею. Сярэднестатыстычны расеец не адчувае сябе за мяжой у Беларусі. Усюды гавораць па-расейску, слухаюць расейскую музыку, а па тэлевізары паказваюць расейскія каналы.

Калі б ва Украіне Уладзімір Пуцін змог рэалізаваць усе свае планы, калі б пасля "вызвольнага маршу" ў Крыме адбыўся такі ж марш на Данбасе, а прарасейскі антымайдан зрынуў урад у Кіеве і на чале Украіны стаў новы прарасейскі палітык, расейскі нацыяналізм захацеў бы ад Крамля большага. Тады б маскоўскі праект Еўразійскага саюза ператварыўся б у новы СССР. І Беларусь з яе прарасейскімі і прапуцінскімі настроямі стала б безабароннай перад гэтай пагрозай".

Але аўтар заўважае, што Украіна пачала супраціўляцца. Прарасейскія баевікі разам з расейскім войскам не змаглі захапіць нават Луганскую і Данецкую вобласць цалкам. Масква пагрузілася ў эканамічны крызіс і не можа сабе дазволіць канфлікты з іншымі суседзямі. Такім чынам, незалежнасць Беларусі засталася абароненай.

Аўтар нагадвае, што Крэмль заўсёды ставіў беларускую суверэннасць пад пытанне, калі перажываў цяжкасці. У папярэдні раз гэта адбылося ў 1918 годзе, калі расейцы сілай ліквідавалі нацыянальную беларускую дзяржаву, далучыўшы яе да СССР. А сучасная Беларусь з'явілася пасля распаду савецкай імперыі.

"Сённяшняя слабасць Расеі дае новы шанец для Беларусі вырвацца з-пад дамінавання Расеі. Пытанне толькі ў тым, ці зможа Беларусь, а дакладней, яе эліты, ім скарыстацца", - гаворыцца ў артыкуле.