Надзею Саўчанку прывезлі ў суд расейскага Данецка
3- 30.07.2015, 10:26
- 9,264
Украінскую лётчыцу даставілі з СІЗА №3 у Новачаркаску ў Данецкі гарадскі суд.
Надзея Саўчанка, па крымінальнай справе якой прызначаныя папярэднія слуханні, у чацвер раніцай дастаўленая ў Данецкі гарадскі суд (Растоўская вобласць), паведаміла журналістам у чацвер прэс-сакратарка гарсуда Таццяна Дзіева, паведамляе «Интерфакс-Украина».
Судовае пасяджэнне з удзелам бакоў будзе закрытым і пачнецца а 11.00. Падчас пасяджэння бакі заявяць свае хадайніцтвы. Пасля іх дазволу суд прызначыць дату разгляду справы.
Надзея Саўчанка, якая служыла ў Добраахвотніцкім батальёне «Айдар», была захопленая ў палон прарасейскімі сепаратыстамі ў Луганскай вобласці мінулым летам і перапраўлена ў Расею. Яна знаходзіцца ў расейскім СІЗА з лета 2014 года. У снежні ўкраінка абвясціла галадоўку ў знак пратэсту супраць затрымання. 5 сакавіка адвакаты Саўчанкі паведамілі, што яна наважыла часткова прыпыніць галадоўку, пасля 82 дзён. 11 сакавіка, адвакат украінкі паведаміў, што самаадчуванне яго падабароннай пасля частковай адмовы ад галадання не палепшылася. У сваю чаргу Саўчанка прыстрашыла зноў пачаць галадоўку, калі да яе не пусцяць украінскіх лекараў.
Надзея Саўчанка абраная народным дэпутатам Украіны па спісе партыі «Бацькаўшчына». Таксама яна з'яўляецца дэпутатам ПАРЕ.