Карл Більт: Варуфакіс бяжыць з карабля, разбурыўшы яго
- 6.07.2015, 11:16
- 5,053
Былы міністр замежных спраў Швецыі назваў адстаўку міністра фінансаў Грэцыі Яніса Варуфакіса ўцёкамі.
Адстаўка міністра фінансаў Грэцыі - гэта ўцёкі. Такое меркаванне выказаў былы міністр замежных спраў Швецыі Карл Більт на сваёй старонцы ў Twitter.
«Грэцкі міністр фінансаў Варуфакіс бяжыць з карабля пасля таго, як давёў яго да катастрофы», - напісаў Більт.
Брытанскі журналіст Х'юга Дыксан мяркуе, што адстаўка міністра фінансаў Грэцыі Яніса Варуфакіса можа азначаць жаданне дыстанцыявацца ад сітуацыі ў выпадку, калі Грэцыя не зможа дамовіцца з крэдыторамі - і нежаданне абняславіцца, калі ўсё ж такі дамовіцца. У той жа час, сыход Варуфакіса з пасады трохі павялічвае шанцы Грэцыі дамовіцца, хоць усё роўна яны нікчэмна малыя, піша liga.net.
Нагадаем, сёння раніцай Яніс Варуфакіс заявіў аб сваёй адстаўцы праз нежаданне прадстаўнікоў Еўрагрупы весці з ім перамовы. Цяпер ужо былы міністр фінансаў заявіў аб поўнай падтрымцы палітыкі прэм'ер-міністра Алексіса Цыпраса, новага міністра фінансаў і ўрада Грэцыі.
Раней Варуфакіс заявіў аб магчымасці адстаўкі грэцкага ўрада ў выпадку, калі насельніцтва краіны прагаласуе на рэферэндуме за прапановы крэдытораў. Аднак учора больш за 60% грэкаў прагаласавалі супраць праграмы рэформаў і эканоміі, прапанаванай Тройкай.