Серэна Уільямс: Сустрэча з Азаранкай - гэта магчымасць праверыць сябе

Першая ракетка свету амерыканка падвяла вынік чвэрцьфіналу Уімблдона, у якім яна падолела беларуску Вікторыю Азаранку.

Серэну Уільямс цытуе афіцыйны сайт WTA, піша "Прессбол".

«У нас з Вікторыяй заўсёды выдатныя матчы, - заявіла амерыканская тэнісістка. - Яна заўсёды даводзіць справу да трэцяга сэта, і ў гэтых трэціх сэтах у нас таксама ідзе барацьба. Кожны раз, калі я бачу ў сетцы яе імя побач са сваім, я радуюся , таму для мяне сустрэча з ёй - гэта магчымасць праверыць сябе, свой узровень. Гэта здараецца практычна на кожным турніры, я ўжо прывыкаю.

Я ганаруся Вікторыяй, тым, як яна вярнулася пасля траўмаў. Я яшчэ ў Мадрыдзе сказала ёй, што яна праз столькі ўсяго прайшла, і я ёю захапляюся і падтрымліваю. Мы выдатна ладзім за межамі корта. Яна вельмі добрая, мы пастаянна перапісваемся, калі ўсё добра.

Я сапраўды вельмі цёпла да яе стаўлюся. На корце яна люты змагар, але як толькі Вікторыя з яго сыходзіць - гэта іншы чалавек. Гэта цікава, і гэта кажа аб яе павазе да людзей».

Нагадаем, у матчы 1/4 фіналу Уімблдона Вікторыя Азаранка саступіла Серэне Уільямс (6:3, 2:6, 3:6).