Навукоўцы высветлілі, што відэа з катамі пазбаўляюць ад санлівасці
1- 27.08.2015, 11:48
- 20,602
Група навукоўцаў Амерыканскага хімічнага грамадства правяла даследаванне з мэтай высветліць, як заставацца бадзёрым цягам усяго дня.
Навуковая арганізацыя высветліла, што змагацца з санлівасцю дапаможа не толькі кава. Навукоўцы сцвярджаюць, што заставацца энэргічным і бадзёрым без кафеіну дапамогуць жартаўлівыя відэа з каткамі, пітная вада, а таксама танцы і музыка, паведамляе Daily Mail.
Відэа з катамі здольнае падняць узровень гармонаў, якія адказваюць за канцэнтрацыю ўвагі і панізіць узровень гармону стрэсу картызолу, вада дапаможа пазбегнуць абязводжвання, што правакуе стомленасць, а танцы і музыка падвысяць узровень энэргіі і здымуць напружанне. Акрамя таго, навукоўцы рэкамендуюць працаваць пры яркім асвятленні, каб пазбегнуць дрымотнасці, піша «Новы час».
«Даследаванні дэманструюць сувязь паміж яркім асвятленнем і ўзроўнем пільнасці чалавека. Калі адчуваеце стомленасць цягам працоўнага дня, неабходна выйсці на вуліцу на сонца. Гэта дапаможа аднавіць сілы», - кажуць спецыялісты.
Раней навукоўцы з Універсітэта Індыяны, ЗША давялі, што відэа з катамі павялічваюць энэргію, прыносяць станоўчыя эмоцыі і памяншаюць негатыўныя пачуцці.