Енс Столтэнбэрг: Грузія можа разлічваць на NATO
- 27.08.2015, 12:37
- 3,007
Грузія мае ўсе патрэбныя інструменты для таго, каб працягваць рух у кірунку сяброўства ў Альянсе.
Пра гэта заявіў генеральны сакратар NATO Енс Столтэнбэрг падчас візіту ў Тбілісі, паведамляе "Еўрапейская праўда".
"Мы абмеркавалі шырокае кола пытанняў аб нашым шчыльным супрацоўніцтве, ваш шлях рэформаў і сітуацыю ў сфэры бяспекі ў рэгіёне. Грузія - гэта моцны і надзейны ўклад у нашу агульную бяспеку. Вашы войскі стаялі поплеч з NATO цягам гадоў. Грузія з'яўляецца другім памерам памочнікам у нашай цвёрдай падтрымцы місіі ў Афганістане", - сказаў Столтэнбэрг.
Паводле ягоных слоў, супрацоўніцтва з NATO цягам гадоў дапамагала грузінскім узброеным сілам стаць больш баяздольнымі.
"Сёння мы будзем паглыбляць наша супрацоўніцтва. Адкрыццё Аб'яднанага цэнтра навучання і ацэньвання стане важным крокам у далейшым паглыбленні нашага супрацоўніцтва. Гэта дапаможа зрабіць Грузію і грузінскія войскі больш баяздольнымі і сучаснымі. І ён будзе ўмацоўваць супрацоўніцтва паміж NATO і дзяржавамі-партнёрамі, спрыяць міжнароднаму міру і бяспецы", - адзначыў генеральны сакратар Альянсу.
Столтэнбэрг нагадаў, што надоечы Альянс правёў першыя вучэнні ў Грузіі. Акрамя таго, экспэрты актыўна працуюць з Міністэрствам абароны Грузіі для вайсковай рэформы.
"Так што цяпер усё больш Грузіі ў NATO і NATO ў Грузіі. І ўсе гэтыя намаганні дапамаглі Грузіі наблізіць ваша імкненне да сяброўства ў NATO. Грузія валодае патрэбнымі інструментамі для таго, каб працягваць рух у кірунку сяброўства", - сказаў ён.
Генеральны сакратар NATO падкрэсліў, што еўраатлантычны шлях зойме пэўны час і запатрабуе намаганняў і рэальных змен.
"Я ведаю, што грузінскі народ і ўрад Грузіі схільныя да таго, каб ісці гэтым шляхам. Мы ўважліва сочым за рэформамі, у тым ліку судовай сістэмы. Я вітаю значны прагрэс і з нецярплівасцю чакаю далейшага прагрэсу. NATO разлічвае на Грузію. І Грузія можа разлічваць на NATO", - падкрэсліў ён.