Леў Марголін: Да канца года даляр будзе па 20 тысяч

Пасля «выбараў» беларусаў, акрамя дэвальвацыі, чакаюць новыя сюрпрызы: падаражанне камунальных паслуг і праезду ў грамадскім транспарце.

Сёння падчас наведвання ААТ «Баранавіцкае вытворчае баваўнянае аб'яднанне» Аляксандр Лукашэнка паведаміў, што не будзе стрымліваць падзенне курсу беларускага рубля, інакш «разава прыйдзецца на 30% дэвальваваць валюту». Таксама дыктатар паспрабаваў перакласці адказнасць за валютны крызіс на грамадзян Беларусі, сказаўшы працаўнікам прадпрыемства: «Не бегайце вы па гэтых абменніках. Вы ствараеце лішнія праблемы».

Гэтыя заявы беларускага кіраўніка сайту charter97.org пракаментаваў намеснік старшыні АГП, эканаміст Леў Марголін.

- Як вы ахарактарызуеце выказванне Лукашэнкі аб неўмяшанні ў рэгуляванне курсу саслабелага беларускага рубля?

З гэтай нагоды я магу сказаць вось што: улада абавязкова павінна ўмешвацца ў пытанні валютнага рэгулявання, але не такім чынам, як гэта разумее Аляксандр Лукашэнка - дырэктыўна вызначаць курс або ўзровень дэвальвацыі. Улада павінна праводзіць рэформы такім чынам, каб курс сам па сабе не падаў у дачыненні да свабоднаканверсоўнай валюты.

Пасля трох абвалаў беларускага рубля ўрад і Нацыянальны банк, мабыць, ужо змаглі пераканаць Лукашэнку, што ў гэтыя пытанні яму лепш не ўмешвацца «у гумовых ботах», таму што сапраўды стане толькі горш.

Улічваючы з якой хуткасцю падае курс беларускага рубля ў жніўні і з якой хуткасцю ён будзе падаць у верасні і кастрычніку, я думаю, што абвальнага падзення на гэты раз атрымаецца пазбегнуць. Але гэта не адмяняе прагноз, што да канца года даляр цалкам можа каштаваць у абменніках 20 тысяч рублёў.

Пасля «выбараў» мы сутыкнемся з тым, што пакуль яшчэ не робіцца, але пра што ўжо гаворыцца: гэта падаражанне камунальных паслуг, гэта падаражанне грамадскага транспарту і шэраг падобных рэчаў. Гэта прыйдзецца рабіць, таму што гэтага патрабуе і Міжнародны валютны фонд і Антыкрызісны фонд ЕўрАзЭС. Такіх захадаў не пазбегнуць, і яны адназначна прывядуць да чарговага ўсплёску інфляцыі і дэвальвацыі.

- А як вы можаце ацаніць параду дыктатара «не бегаць па абменніках»?

Што тычыцца такога выказвання: гэта парада багатага бедняку. На жаль, народ не можа не «бегаць». Людзі разумеюць, што калі раней бабуля магла купіць свайму ўнуку 4 банана, то заўтра яна зможа купіць 2 банана. Мы жывем не ў 19 стагоддзі і толькі беларускімі прадуктамі мы не абыдземся: нам патрэбныя і садавіна да стала, і імпартныя лекі.

Таму «парада» Лукашэнкі - гэта парада чалавека, які нічога такога ніколі на сабе не адчуваў.