Больш за 100 крам могуць пакараць за «алкагольныя» запазычаннасці
10- 27.08.2015, 17:46
- 20,392
Улады Менска запатрабавалі ад гандлёвых сетак і крам да канца дня 28 жніўня разлічыцца за пастаўлены алкаголь.
Менгарвыканкам 26 жніўня правёў нараду з гандлёвымі сеткамі, крамамі і ўстановамі грамадскага харчавання. Ад гандлёвых аб'ектаў запатрабавалі тэрмінова разлічыцца з айчыннымі вытворцамі алкаголю за пастаўленую прадукцыю, паведамляе "Ежедневник".
Дэдлайн быў вызначаны да канца дня 28 жніўня. Тых, хто не паспее да гэтага тэрміну пагасіць пратэрмінаваную запазычанасць, абяцаюць пазбавіць ліцэнзіі і прыпыніць дзейнасць.
У спісе кандыдатаў на пакаранне - ужо пацярпелая ад санкцый Мінгандлю сетка магазінаў "Дабраном". Тут праверка выявіла пратэрмінаваную крэдыторскую запазычанасць перад пастаўшчыкамі алкаголю і тытунёвых вырабаў. "Звесткі пра пратэрмінаваную запазычанасць 21 жніўня 2015 г. накіраваныя ў ліцэнзійны орган (Менскі райвыканкам) для прыняцця захадаў рэагавання ў частцы дзеяння ліцэнзіі на права ажыццяўлення раздробнага гандлю алкагольнымі напоямі і тытунёвымі вырабамі", - паведамілі ў Мінгандлю.
Гарадскія ўлады нагадалі прадстаўнікам гандлю, што наяўнасць пратэрмінаванай запазычанасці 2 і больш разоў на працягу года ў разліках за пастаўленыя алкагольныя напоі і тытунёвыя вырабы з'яўляецца грубым парушэннем заканадаўства аб ліцэнзаванні, пра што абвяшчае ўказ Лукашэнкі 1 верасня 2010 года.
Нядаўна дыктатар абураўся станам алкагольнай галіны беларускай прамысловасці і распарадзіўся разгрузіць склады вытворцаў спіртнога да 15 верасня.
Менгарвыканкам ужо збіраў нараду паводле гэтага пытання, на якім пастанавіў «у самыя кароткія тэрміны максімальна насыціць аб'екты гандлю і грамадскага харчавання айчыннымі алкагольнымі напоямі і півам».