Казакі разбурылі скульптуру Мефістофеля ў Пецярбургу

У чацвер, 27 жніўня паліцыя ў Пецярбургу пачала праверку паводле факта знішчэння аб'екта культурнай спадчыны.

Адказнасць за разбурэнне скульптуры Мефістофеля на даходным доме Лішнеўскага ў Санкт-Пецярбургу ўзялі на сябе казакі. Паведамленне аб гэтым адправіў у рэдакцыю «Фонтанки.ру» былы кіраўнік арганізацыі «Казакі Санкт-Пецярбурга» Дзяніс Горчын. Ён падкрэсліў, што прадстаўнікі Рускай праваслаўнай царквы не маюць дачынення да таго, што здарылася, піша Lenta.ru.

«Д'ябла з дома на Петраградке збілі мы. Ён стаў славутасцю, яго адмыслова паказвалі ў відэа, у даведніках, што ёсць такая неспадзяванка - насупраць царквы вісіць фігура д'ябла, якая не дае ўстанавіць крыж. Нас абурала, што гэтая жудасная легенда стала прынадай турыстаў, гонарам, атрымліваецца адкрытае пакланенне сатане», - адзначаецца ў пасланні.

Аўтар ліста дадаў, што ў Пецярбургу ёсць некалькі такіх легенд, і заклікаў гараджан усяляк з імі змагацца.

Паводле ягоных слоў, казакі гатовыя бясплатна ахоўваць Эрмітаж, калі спатрэбіцца.

«Але Эрмітаж - гэта сапраўдная культура, наш гонар. А такое смецце, з якога раздулі, што мы ледзь не ІДІЛ (забароненая ў Расеі тэрарыстычная групоўка «Ісламская дзяржава», якая раней звалася «Ісламская дзяржава Ірака і Леванта» - Рэд.), гэта трэба адзін раз прыбраць і жыць сапраўднай культурай, якая цяпер не будзе захінацца», - гаворыцца ў паведамленні Горчына.

У чацвер 27 жніўня паліцыя ў Пецярбургу пачала праверку паводле факта знішчэння аб'екта культурнай спадчыны. Улады Пецярбурга адзначылі, што ў доме Лішнеўскага ішоў рамонт, але ён ніяк не дакранаўся скульптуры Мефістофеля, якая ўпрыгожвала франтон будынка. Пра гэта РІА «Новости» распавялі ў адміністрацыі Петраградскага раёна. Афіцыйна вінаватых таго, што здарылася пакуль не называлі. Пецярбургская епархія заявіла, што не датычная да таго, што здарылася.

У сераду, 26 жніўня невядомы мужчына ў працоўнай вопратцы збіў кувалдай каменную фігуру Мефістофеля на доме, які архітэктар Аляксандр Лішнеўскі пабудаваў у 1910-1911-х гадах. Пасля гэтага ён і яшчэ некалькі чалавек сабралі аскепкі і павезлі на «Газелі». Як патлумачылі мясцовыя жыхары, некалькі гадоў таму святар мясцовага прыходу сцвярджаў, што скульптуры дэмана не месца на Лахцінскай вуліцы, бо насупраць будуецца праваслаўны храм.