Прэм'ер Малайзіі адмовіўся сысці ў адстаўку ў адказ на пратэсты

Прэм'ер-міністр Малайзіі Наджыб Разак адмовіўся падаць у адстаўку ў адказ на патрабаванні дэманстрантаў, якія абвінавачваюць яго ў карупцыі.

У мінулыя выходныя некалькі дзесяткаў тысяч чалавек узялі ўдзел у акцыях пратэсту ў сталіцы краіны Куала-Лумпуры, нагадвае BBC.

Абурэнне актывістаў выклікалі навіны аб тым, што на банкаўскі рахунак прэм'ера Малайзіі было залічана 700 млн даляраў ад невядомых замежных спонсараў.

Сам Наджыб Разак адхіляе ўсе абвінавачванні ў свой адрас і кажа, што актывісты ачарняюць вобраз Малайзіі на міжнароднай арэне.

Як заявіў прэм'ер у свой прамове з нагоды Дня незалежнасці Малайзіі, вулічныя пратэсты «не з'яўляюцца адэкватным каналам для выказвання меркаванняў у дэмакратычнай дзяржаве».