Ангела Мэркель: Міграцыя ставіць пад пытанне Шэнгенскае пагадненне

Пытанне размеркавання мігрантаў у Еўропе, застаўшыся неразвязаным, паставіць пад пытанне мэтазгоднасць далейшага існавання Шэнгенскага пагаднення.

Пра гэта заявіла ў панядзелак федэральная канцлерка Нямеччыны Ангела Мэркель, паведамляе расейская служба BBC.

"Калі нам не ўдасца дамовіцца аб справядлівым размеркаванні бежанцаў, то вядома, пытанне Шэнгена для многіх зноў стане часткай парадку дня", - заявіла Мэркель на прэс-канферэнцыі ў Берліне.

З пачатку лета ў Еўропе адбылося некалькі гучных скандалаў, звязаных з нелегальнымі мігрантамі, якія спрабуюць патрапіць у заходнееўрапейскія краіны. З пачатку жніўня Еўропа кажа пра спробы мігрантаў прабрацца ў Брытанію па Еўратунэлю з французскага порта Кале.

Апошняе па часе надзвычайнае здарэнне адбылося на мінулым тыдні, калі на абочыне вядучай у Вену аўтастрады быў знойдзены грузавік з целамі 59 мужчын, васьмі жанчын і чатырох дзяцей. Паводле падазрэння ў дачыненні да гібелі мігрантаў вугорскія ўлады арыштавалі чатырох чалавек.

У панядзелак, пасля таго як аўстрыйскія ўлады прынялі пастанову даглядаць усе грузавікі, якія ўязджаюць у краіну, на трасе, што вядзе з Будапешта ў Вену, утварыўся затор даўжынёй 25 кіламетраў.