Мішэль Плаціні абяцае змяніць фармат Чэмпіянатаў свету

У тым выпадку, калі яго выберуць кіраўніком Міжнароднай федэрацыі, дзеючы прэзідэнт UEFА абяцае рэфармаваць мундыяль і правілы гульні.

Мішэль Плаціні, які нядаўна афіцыйна абвясціў аб вылучэнні сваёй кандыдатуры на выбары прэзідэнта FIFА, збіраецца ўключыць у сваю выбарчую праграму ідэю аб патрэбе павелічэння колькасці каманд, якія ўдзельнічаюць у чэмпіянаце свету, з 32 да 40, піша сайт Xsport.

Французскі чыноўнік плануе падзяліцца сваёй прапановай ужо на лёсаванні групавой стадыі Лігі чэмпіёнаў, якая адбудзецца 27 жніўня ў Манака.

Нагадаем, раней Плаціні прыняў пастанову павялічыць колькасць удзельнікаў фінальнай стадыі чэмпіянату Еўропы з 16 да 24 каманд.

Акрамя таго, паводле звестак крыніцы, кіраўнік УЕФА таксама збіраецца ўвесці белыя карткі, якія прадугледжваюць выдаленне гульца на 10 хвілін, і забараніць праводзіць трансферы футбалістаў, узрост якіх не дасягнуў 18 гадоў.