Аляксандр Ермаковіч: Наўрад ці варта чакаць сюрпрызаў з боку «Відэатону»

Прэс-канферэнцыя з удзелам галоўнага трэнера БАТЭ прайшла напярэдадні матчу ў адказ трэцяга кваліфікацыйнага раўнду Лігі чэмпіёнаў.

Пра тое, што не атрымалася ў Секешфехервары, ці выйдзе на поле ў сустрэчы ў адказ Ігар Стасевіч і ў чым можна браць прыклад з менскага «Дынама» піша «Прессбол».

- Як настрой у камандзе? Трэба меркаваць, добры, улічваючы хатні поспех у гульні са Шкловам?

- Так, як вы ведаеце, матч са «Спартаком» правялі досыць нядрэнна. Радуе, што шмат забілі. У астатнім рыхтаваліся ў штатным рэжыме. Натуральна, у бадзёрым настроі.

- Ёсць свежы прыклад таго, як разгромная перамога ў Кубку згуляла злы жарт на еўраарэне. Гаворка пра «Шахцёр», які ўзяў верх над «Слонімам», а затым спасаваў перад «Вольфсбергам». Ці не баіцеся зваротнага эфекту вікторыі на барысаўскім гарадскім?

- Не думаю, што ёсць сэнс у гэтым выпадку праводзіць паралелі. Кожная новая сустрэча - гэта новая гісторыя са сваімі заканамернасцямі.

- Тая акалічнасць, што ў гэтым годзе ў Лізе Еўропы зноў нядрэнна выступае менскае «Дынама», трохі здымае груз адказнасці з каманды або, наадварот, дадае, прыўносячы дух завочнага суперніцтва?

- Тут цяжка нешта казаць. Не схаваю, мы глядзелі паядынак дынамаўцаў супраць «Цюрыха», і я - у тым ліку. Каманда паказала вельмі моцную гульню. Нават у глыбіні душы шкадую, што ў Вугоршчыне мы выглядалі крыху горш. Каб быў такі ж добры настрой, напэўна глядзеліся б лепш. Зрэшты, ёсць адказная бітва, каб паказаць усё магчымае.

- Як рухаецца працэс аднаўлення Стасевіча: ці магчымае ягонае з'яўленне на полі ў сераду?

- Удзел Ігара пад вялікім пытаннем. Яго яшчэ турбуе траўма, хоць адну трэніроўку з камандай паўабаронца ўжо правёў. Канчатковую пастанову прымем непасрэдна перад матчам.

- Наколькі задаволеныя былі дзеяннямі Аляксандра Валадзько?

- Памятаючы, колькі ён прапусціў, цалкам. Зразумела, нічога звышнатуральнага.

- З вашых слоў, каманда ў Секешфехервары згуляла ніжэй за свой узровень. Удалося зразумець, чаму так?

- На мой погляд, хваляванне і адказнасць у першую чаргу скавалі нашы дзеянні. У гэтым асноўная прычына. Вядома, ёсць прэтэнзіі індывідуальнага характару, тактычна не зусім выдатна сябе паказалі. Частку момантаў ужо разабралі, аднак яшчэ будуць тэарэтычныя заняткі.

- Наколькі моцна засмуціў прапушчаны ў канцоўцы гасцявой баталіі мяч?

- Вядома, ён паўплываў. Усё ж такі перамога ёсць перамога. Хоць усякая нічыя нас задавальняла. Зразумела, што прапускаць нельга было, аднак нічога страшнага не адбылося.

- «Відэатон» пакуль ні разу не саступіў у чэмпіянаце, кожны раз прапускаючы першым. Тое ж датычыцца і першай гульні з БАТЭ. Выпадковасць або заканамернасць: ці звярталі на гэты факт увагу падапечных?

- Статыстыка добра вядомая, аднак хлопцам пра яе не распавядалі.

- Адна сустрэча ззаду. Цяпер напэўна можаце параўнаць сілу «Відэатону» і «Дэбрэцэна», з якім даводзілася змагацца ў мінулай кампаніі.

- Цяжка супастаўляць. Абсалютна розныя калектывы з непадобным стылем. Відавочна адно: і адна, і другая каманда паказвае якасны футбол.

- Спаборнік можа чымсьці здзівіць, ці за гэты час паспелі ў дастатковай ступені яго вывучыць?

- Думаю, наўрад ці нас чакаюць сюрпрызы з боку гасцей. Зрэшты, і нам будзе складана выставіць апаненту што-небудзь новае. Мы больш-менш адзін аднаго ведаем.

- Адчуваецца напружанне ў той сувязі, што еўракубкавая восень клубу гарантаваная ў выпадку поспеху ў супрацьстаянні з вугорцамі?

- Не сказаў бы. У БАТЭ ёсць пэўны досвед, таму лішняга страху няма. Хоць адказнасць і хваляванне прысутнічаюць напярэдадні кожнага матчу. Гэта нармальна. Але мы ўпэўненыя ў сваіх сілах. Нам - усім, хто перажывае за каманду, - патрэбнае свята. Хачу, каб заўзятары аб'ядналіся і падтрымалі гульцоў, а яны, у сваю чаргу, дамагліся перамогі і рухаліся далей.

- Як мяркуеце, які індыкатар цікавасці да каманды лепшы: той факт, што за два дні да матчу прададзеныя ўсе квіткі, або колькасць прадстаўнікоў СМІ на нашай прэс-канферэнцыі?

- Гм, гэта стандартная сітуацыя. Безумоўна, натхняе, што чакаецца аншлаг. Гэта плюс і важней таго, колькі чалавек прысутнічае на маёй прэс-канферэнцыі. Вельмі спадзяемся на заўтрашнюю падтрымку. З ёй будзе лягчэй.

- Вы разгледзелі якасць газона напярэдадні гульні?

- Упэўнены, ён найлепшы за ўвесь час, што гуляем на «Барысаў-Арэне». Каму гэта на руку? Галоўнае - паспрыяе прыгожаму відовішчнаму футболу, а значыць, гледачы атрымаюць задавальненне.

- Вы пагутарылі з Капскім перад выхадам да нас. Пра што, калі не сакрэт?

- Звычайныя працоўныя пытанні. Анатоль Анатольевіч таксама педантычна ставіцца да якасці поля. У гэтай сувязі перакінуліся парай фраз.