Дрэвы ў Полацку апрануць у «вышыванкі»

Амаль 30 удзельнікаў арт-праекту «Арнаменты на дрэвах» пакінуць свой след у Полацку.

7 жніўня мастакі нанясуць дэкаратыўныя кампазіцыі на 10 дрэў. Свае аўтографы на дрэвах у Полацку пакінуць не толькі палачане, але і прадстаўнікі Браслава, Віцебска і Нінбургу (Нямеччына). Яны ўпрыгожаць расліны арнаментамі, якія будуць складацца з кропак, ліній, колаў, ромбаў, піша БелТА.

«Паводле папярэдніх разлікаў, на выкананне мастацкай работы спатрэбіцца 10 кілаграмаў садовай пабелкі і 10 пачкаў гуашы. Дрэвы будуць распісваць фарбамі, якія не нанясуць ім шкоды», - падкрэслілі ў прэс-службе. Сам працэс роспісу змогуць назіраць усе ахвотныя. Мэта мерапрыемства - азнаёміць гледачоў з разнастайнымі тыпамі арнаменту, далучыць да мастацтва і паказаць узоры, якія могуць быць выкарыстаныя ў практычнай рабоце выхаванцамі мастацкіх школ, аматарамі выяўленчага мастацтва, а таксама мастакамі, якія працуюць у галіне архітэктуры, дэкаратыўнай творчасці і іншых кірунках.

«Відавочна і тое, што новыя арт-аб'екты нададуць Полацку асаблівы шарм», - перакананыя ў райвыканкаме. Арнамент - неад'емная частка мастацтва, мастацкае адлюстраванне светапогляду і культуры многіх народаў. Ён выкарыстоўваецца для афармлення практычна ўсяго, што створана чалавекам, няхай гэта будуць прадметы побыту або архітэктурныя збудаванні. Арнамент стаіць на першым месцы ў здольнасці пранікнення ў розныя тыпы мастацтва, набываючы новы сэнс, які раней з ім не асацыяваўся.