За пабег з залы суда двух братоў прысудзілі да 12 і 20 гадоў турмы

Менскі гарадскі суд вынес прысуд паводле справы ў дачыненні да двух братоў, якія паспрабавалі ўцячы з-пад варты.

Справа грамадзян Казахстана Віталя і Яўгена Паповых слухалася ў закрытым судовым пасяджэнні. Менгарсуд прысудзіў Віталя Папова да 20 гадоў пазбаўлення волі з канфіскацыяй маёмасці, з адбываннем пакарання ў калоніі ўзмоцненага рэжыму, Яўгена Папова - да 12 гадоў пазбаўлення волі з канфіскацыяй маёмасці, з адбываннем пакарання ў калоніі ўзмоцненага рэжыму, піша БелаПАН.

Летась 20 лістапада ў судзе Савецкага раёна Менска разглядалася крымінальная справа аб махлярстве, учыненая групай асобаў у асабліва буйным памеры. Пасля заканчэння судовага паседжання двое братоў 1979 і 1983 гадоў нараджэння, якія праходзілі паводле справы ў якасці абвінавачаных, у канвойным пакоі аказалі супраціў супрацоўнікам міліцыі і паспрабавалі збегчы. Дзякуючы зладжаным дзеянням канвою спроба ўцёкаў была папярэджаная.

Спрабуючы збегчы, старэйшы брат скарыстаўся фрагментам металічнай трубы, знойдзенай у адным з памяшканняў агульнага карыстання. Ім ён прычыніў аднаму з канваіраў цяжкія цялесныя пашкоджанні, але супрацоўнік міліцыі здолеў абяззброіць нападніка. Два іншыя канваіры ўжылі спецыяльныя сродкі і фізічную сілу для спынення дзеянняў зламысніка і малодшага брата, які спрабаваў аказаць яму садзейнічанне. Пры гэтым былі зробленыя папераджальныя стрэлы з табельнай зброі. Траўмаваны супрацоўнік міліцыі быў шпіталізаваны, яму аказаная кваліфікаваная медыцынская дапамога.

Як вынікае з прысуду, падчас інцыдэнту супрацоўнікі міліцыі зрабілі два стрэлы з табельнай зброі, ніхто не пацярпеў.

Старэйшы з фігурантаў абвінавачваўся ў спробе ўцёкаў з-пад варты, здзейсненай групай асоб з прымяненнем гвалту (ч.1 арт.14 і ч.2 арт.413 КК), і замаху на забойства супрацоўніка міліцыі ў сувязі з выкананнем ім абавязкаў аховы грамадскага парадку (ч.1 арт.14 і арт.362 КК); малодшы - у спробе ўцёкаў (ч.1 арт.14 і ч.2 арт.413 КК) і дапамаганні ў замаху на забойства супрацоўніка міліцыі (ч.6 арт.16, ч.1 арт.14 і арт.362 КК).

Падчас следства ініцыятар уцёкаў матываваў свае дзеянні нервовым зрывам у сувязі з нездаволенасцю ходам судовага працэсу і, прынамсі, нежаданнем быць асуджаным на працяглы тэрмін пазбаўлення волі, пра які хадайнічаў дзяржабвінаваўца перад судом.

Суд вынес вызначэнне ў адрас начальніка следчай управы УСК Менску аб парушэнні законнасці пры правядзенні папярэдняга следства.

Прысуд можа быць абскарджаны ў Вярхоўным судзе праз Менскі гарадскі суд. Ці будзе гэта зроблена, адвакаты асуджаных пакуль не ведаюць.