Клаўдыё Гуджэроцці: Да «выбараў» візіту Лукашэнкі ў Ватыкан не будзе
3- 3.09.2015, 9:00
- 13,405
Вызваленне беларускіх палітвязняў і магчымы візіт Аляксандра Лукашэнкі ў Ватыкан - абсалютна не звязаныя паміж сабой рэчы.
Пра гэта заявіў БелаПАН апостальскі нунцый Клаўдыё Гуджэроцці.
«Гэта было зроблена на непасрэдную просьбу папы. Мы гэтым ганарымся, таму што гэта прынесла ў некаторай ступені мір і гармонію ў дзяржаве. Я рады, што беларускае грамадства ацаніла гэтыя дзеянні папы», - адзначыў пасол Ватыкана.
Ён зняпраўдзіў інфармацыю аб магчымым візіце Аляксандра Лукашэнкі ў Ватыкан ў верасні 2015 года і нагадаў, што папа не сустракаецца з прэзідэнтамі, тэрмін паўнамоцтваў якіх падыходзіць да канца (выбары пройдуць 11 кастрычніка).
Пра гатоўнасць Ватыкана прыняць Лукашэнка заяўляў кардынал П'етра Паролін падчас прыезду ў Менск у сакавіку сёлета. З ягоных слоў, магчымасць арганізацыі такога візіту абмяркоўвалася падчас ягонай сустрэч з прадстаўнікамі беларускіх дзяржорганаў.
Апостальскі нунцый Клаўдыё Гуджэроцці ў складзе дэлегацыі дыпламатаў 2-3 верасня наведвае Гомель. Візіт арганізавала прадстаўніцтва Управы вярхоўнага камісара ААН у справах уцекачоў. Мэта - азнаёміць дыпламатычную супольнасць Беларусі з сітуацыяй вакол уцекачоў і асоб, якія шукаюць прытулак.
Праграма візіту ўключае сустрэчу з кіраўніцтвам аблвыканкама і гарвыканкама, прадстаўнікамі УУС і іншых структур. Дэлегацыя наведала пункт часовага размяшчэння, сацыяльнай адаптацыі і рэабілітацыі ўцекачоў, сустрэлася з сірыйскімі і ўкраінскімі сем'ямі.
Апостальскі нунцый правёў таксама сустрэчу з гомельскімі католікамі.