Ля берагоў ЗША заўважылі расейскі выведвальны карабель
- 4.09.2015, 14:41
- 5,596
Ля берагоў штата Джорджыя было заўважанае расейскае выведвальнае судна, абсталяванае для перарэзкі падводных кабеляў.
У ліпені карабель з'явіўся ў паўночнай частцы Атлантыкі і з тых часоў паступова рухаецца да наступнага пункта прызначэння - Кубы. Цяпер ён знаходзіцца прыкладна за 480 кіламетраў ад узбярэжжа ЗША, паведамляе «Голас Амерыкі». Прадстаўнікі Пентагона заяўляюць, што судна застаецца ў міжнародных водах.
Адказваючы на пытанне, ці ёсць ля берагоў Расеі такія выведвальныя караблі ЗША, вайсковы чыноўнік сказаў: «Вядома. А што, па-вашаму, робяць усё гэтыя «Акіянаграфічныя судны»? Кітоў вывучаюць?»
У Штатах Джоджыя на базе Кінгс-Бі знаходзяцца шэсць падводных лодак класа «Агаё», якія здольныя несці 24 міжкантынентальныя балістычныя ракеты «Трайдэнт» кожная. Яшчэ там дыслакуюцца дзве субмарыны, з якіх магчымы запуск сотняў крылатых ракет «Тамагаўк».
18 верасня 2014 два расейскія стратэгічныя ракетаносцы Ту-95 праляцелі над акваторыяй Берынгава мора і ўздоўж паўночнага ўзбярэжжа Аляскі. Амерыканскія вайскоўцы заявілі, што занепакоеныя фактам палётаў расейскіх стратэгічных бамбавікоў паблізу паветранай прасторы ЗША.
У студзені 2015 у гаванскай гавані было заўважана яшчэ адно выведвальнае расейскае судна. За апошні год расейскія выведвальныя караблі неаднаразова бачылі ля берагоў Кубы.