Украінцаў з ID-картамі не пускаюць у Беларусь

Украінскія грамадзяне з ID-картамі замест звыклых папяровых пашпартоў не могуць трапіць у Беларусь.

Як піша «Вячэрні Брэст», кіраўнік аддзялення памежнага кантролю «Макраны» Сяргей Бышык заявіў, што «калі гаворка ідзе пра ўезд у нашу краіну, то парадак просты. Мы тлумачым, што з новым пашпартам перасекчы Дзяржаўную мяжу нельга».

Ён адзначыў, што для гэтага патрэбен альбо замежны, альбо ўнутраны пашпарт старога ўзору.

«Часцей за ўсё бывае, што ў чалавека, які паказаў ID-карту, ёсць і неабходныя дакументы. Калі ж іх няма, на жаль, даводзіцца разварочваць чалавека дадому», – заявіў Бышык.

Нагадаем, паміж Беларуссю і Украінай існуе бязвізавы рэжым, згодна з якім грамадзяне абедзвюх краінаў могуць свабодна перасякаць межы.

Аднак новыя ID-карты ў пераліку неабходных дакументаў пакуль не пазначаныя.

Застаецца дадаць, што дакументы новага ўзору, якія сведчаць асобу грамадзяніна Украіны, былі выпушчаныя ў студзені 2016 года.