Гендырэктар «Еўрагандлю»: Алкаголь ёсць у 40% чэкаў

Раздробныя сеткі выступілі супраць прыняцця ўказа, які рэгулюе абарачэнне алкаголю.

Найбуйнейшыя раздробныя сеткі выступаюць катэгарычна супраць указу, які робіць больш жорсткімі ўмовы рэалізацыі алкагольнай прадукцыі, і прагназуюць негатыўныя наступствы для рынку ў выпадку яго прыняцця. Пра гэта заяўлена 20 кастрычніка на прэс-канферэнцыі ў Менску, паведамляе БелаПАН.

Як паведаміла старшыня Асацыяцыі раздробных сетак Таццяна Закжэўская, падрыхтаваны праект указа прэзідэнта мяркуе, што алкагольная прадукцыя можа прадавацца толькі з 9.00 да 21.00.

«Акрамя гэтага, праект дзяржаўнай пастановы прадугледжвае стварэнне адасобленых падраздзяленняў унутры крам з асобнымі касамі. Крамам з плошчай менш за 300 квадратных метраў будзе нерэальна выканаць гэтае патрабаванне, прыняцце праекта дзярпастановы прывядзе да неімаверных наступстваў для рынку», - падкрэсліла Закжэўская.

Кіраўнікі буйных раздробных сетак, якія прысутнічалі на прэс-канферэнцыі, заявілі, што прыняцце ўказа ў падрыхтаваным выглядзе прывядзе да закрыцця многіх крамаў.

«У выпадку прыняцця ўказа з 17 крамаў у нашай сетцы прыблізна сем-восем не змогуць выканаць нормы дакумента. Адпаведна, ад гэтых крамаў нам давядзецца адмовіцца, каб не дапусціць банкруцтва ўсёй нашай раздробнай сеткі», - заявіў генеральны дырэктар «Постгандлю» Сяргей Смольскі.

У сваю чаргу гендырэктар раздробнай сеткі «Рублёўскі» Наталля Шаблінская адзначыла, што з 71 крамы сеткі выканаць патрабаванні падрыхтаванага ўказа змогуць толькі дзве.

«У 20 крамах спатрэбяцца сур'ёзныя інвестыцыі, то бок, капітальныя выдаткі, для выканання нормаў падрыхтаванага праекта ўказа ў выпадку яго прыняцця. А ў астатніх крамах мы проста не зможам нічога зрабіць, каб прывесці іх у адпаведнасць з нормамі дакумента», - сказала Шаблінская, падкрэсліўшы, што новаўвядзенні выклічуць скарачэнне раздробнага тавараабарачэння.

На яе думку, прыняцце такой дзяржаўнай пастановы прывядзе да росту коштаў на спажывецкім рынку. «Кампенсаваць страты, звязаныя з рэалізацыяй падрыхтаванага праекта дзяржаўнай пастановы, мы не зможам інакш як падвышэннем коштаў рэалізацыі тавараў, чаго нам вельмі не хацелася б рабіць», - падкрэсліла Шаблінская.

Гэтыя асцярогі падзяляе гендырэктар «Еўрагандлю» (сетка крамаў «Еўраопт») Андрэй Зубкоў. «Раздробнае тавараабарачэнне за дзевяць месяцаў знізілася на 3,1%. Алкаголь прысутнічае ў 40% чэкаў, таму калі будзе прыняты падрыхтаваны праект указа, гэта адназначна прывядзе да далейшага скарачэння тавараабарачэння», - заявіў ён.