Туск: ЕЗ дапускае прадаўжэнне санкцый супраць Расеі

Кіраўнік Еўрарады мяркуе, што Еўразвяз павінен прадаўжаць уздзеянне на Маскву.

Прэзідэнт Еўрапейскага Звязу Дональд Туск заявіў, што ЕЗ можа разгледзець розныя варыянты ўздзеяння на расейскія ўлады праз дзеянні Расеі ў Сірыі, паведамляе ВВС.

«Вельмі складана, нават немагчыма казаць пра гэта (пра перамовы з Расеяй - заўвага), не згадваючы пра напады на цывільных асоб і шпіталі ў Алепа. Сёння не будуць прымацца пастановы, але я хачу падкрэсліць, што ЕЗ павінен захаваць усе варыянты, у тым ліку санкцыі, калі злачынства прадоўжацца», - сказаў Туск перад пачаткам саміту Еўразвязу ў Брусэлі.

Прэм'ер-міністр Нідэрландаў Марк Рутэ таксама заявіў, што не падтрымлівае паслабленне рэжыму санкцый у дачыненні да Расеі.

Як адзначаецца ў чарнавым варыянце рэзалюцыі саміту, які цытуе агенцтва Франс прэс, Еўразвяз гатовы разгледзець розныя варыянты падаўжэння санкцый, у тым ліку дадатковыя абмежавальныя захады ў дачыненні да асоб і кампаній, якія падтрымліваюць рэжым прэзідэнта Сірыі Башара Асада.

На мінулым тыдні Брытанія і Злучаныя Штаты звярнуліся да расейскіх уладаў з заклікам дапамагчы пакласці канец вайне ў Сірыі, і не выключылі новых санкцый супраць Асада і ягоных хаўруснікаў.

На наступны дзень прадстаўніца ЕЗ у замежнай палітыцы Федэрыка Магерыні паведаміла, што ЕЗ не разглядае магчымасць увядзення дадатковых санкцый супраць Расеі ў сувязі з бамбаваннямі Алепа, аднак такія захады могуць ужыць да ўрада Башара Асада.