Марчэла Ліпі стаў самым высокааплатным футбольным трэнерам свету

Заробак італьянскага спецыяліста складзе €20 млн у год.

Галоўным трэнерам каманды Кітая прызначаны Марчэла Ліпі, што ў 2006 годзе выйграў чэмпіянат свету з італьянскай камандай. 68-гадовы спецыяліст стане самым высокааплатным трэнерам у свеце з заробкам €20,1 млн у год, піша РБК.

На чале кітайскай каманды Ліпі змяніў Гао Хунбо, пад кіраўніцтвам якога каманда набрала адзін бал у чатырох матчах трэцяга адборачнага раўнда чэмпіянату свету 2018 года. У групе А кітайцы займаюць апошняе, шостае, месца, саступаючы Ірану (10 балаў), Узбекістану (9), Паўднёвай Карэі (7), Сірыі (4) і Катару (3).

У фінальную частку турніру, якая адбудзецца летам 2018 гадоў у Расеі, наўпрост выйдуць дзве найлепшыя каманды групы. Трэцяя каманда правядзе стыкавыя матчы з камандай, якая заняла трэцяе месца ў групе В. Пераможца гэтага супрацьстаяння правядзе стыкавыя матчы з чацвёртай камандай Паўночнай і Цэнтральнай Амерыкі і краін Карыбскага басейна (зоны КАНКАКАФ).

За ўсю гісторыю нацыянальная каманда Кітая толькі адзін раз удзельнічала ў фінальным турніры чэмпіянату свету - у 2002 годзе ў Японіі і Паўднёвай Карэі. Тады камандай кіраваў серб Бора Мілутыновіч. З замежных спецыялістаў кітайцаў таксама трэніравалі немец Клаус Шлапнер, галандзец Ары Хаан, серб Уладзімір Пятровіч, гішпанец Хасэ Антон.